بنکاک میں 300 ملی میٹر بارش، دو روزہ تعطیل کا اعلان

تھائی لینڈ کی کابینہ نے شدید بارشوں اور سیلابی صورتحال کے باعث بنکاک اور اس کے گردونواح کے تین صوبوں میں سرکاری ملازمین کے لیے 28 اور 29 ستمبر کو خصوصی تعطیلات کا اعلان کردیا۔   حکومت کے مطابق خصوصی تعطیلات کا مقصد شہریوں کی آمدورفت کم کرنا اور بارشوں کے باعث پیدا ہونے والی ٹریفک اور سفری مشکلات کو کم کرنا ہے،تاہم اہم سرکاری امور جو ان تعطیلات کے دوران طے شدہ ہیں، متعلقہ اداروں کے سربراہان کی صوابدید کے مطابق جاری رکھے جاسکتے ہیں۔  تعطیلات کے اعلان سے تھائی لینڈ کی آئینی عدالت میں پیر کو ہونے والی ایک اہم مقدمے کی سماعت اور فیصلے کے اعلان کے متاثر ہونے کا خدشہ بھی پیدا ہوگیا تھا۔

بنکاک میں شدید بارشوں کے باعث صورتحال اس قدر خراب ہوگئی کہ میٹروپولیٹن انتظامیہ نے ہفتے کے روز دارالحکومت کو آفت زدہ علاقہ قرار دے دیا تھا۔ حکام کے مطابق 48 گھنٹوں کے دوران تقریباً 300 ملی میٹر بارش ریکارڈ کی گئی، جس کے نتیجے میں شہر کی اہم شاہراہوں پر سیلاب آگیا اور متعدد گاڑیاں جزوی طور پر پانی میں ڈوب گئیں۔ اتوار کو بارش میں کمی آنے کے بعد کئی علاقوں میں سیلابی پانی اترنے لگا، تاہم بعض رہائشی اب بھی اپنے گھروں میں محصور رہے۔

غیرملکی میڈیا کے مطابق بنکاک کی متعدد سڑکیں سیلابی پانی میں ڈوب گئی ہیں اور بعض علاقوں میں کمر تک پانی جمع ہونے کے باعث شہریوں کو آمدورفت میں شدید مشکلات کا سامنا ہے۔ کئی مقامات پر سڑکوں پر کشتیاں چلتی نظر آئیں جبکہ سیلاب کے باعث ٹریفک کا نظام بھی بری طرح متاثر ہوا ہے۔ رپورٹ کے مطابق شہر کے مختلف علاقوں میں آج صبح سے مزید 10 ملی میٹر بارش ریکارڈ کی گئی ہے، جبکہ تھائی محکمہ موسمیات نے مزید شدید بارشوں کا سلسلہ جاری رہنے کی پیش گوئی کی ہے۔ بنکاک میں گزشتہ دو روز کے دوران 300 ملی میٹر بارش ریکارڈ کی گئی، جس کے بعد حکام نے گزشتہ روز شہر کو آفت زدہ قرار دیا تھا۔