انڈونیشیا کے نائب صدر جبران راکا (Gibran Rakabuming Raka) نے
اپنے عہدے سے استعفیٰ دے دیا ہے، انہوں نے صدر پرابوو سوبیانتو (Prabowo
Subianto) کو استعفیٰ پیش کیا۔ ان کے مستعفی ہونے سے ملک میں سیاسی غیر یقینی
صورتحال بڑھنے اور حکمران اتحاد میں اختلافات گہرے ہونے کا خدشہ پیدا ہوگیا ہے۔ 39 سالہ جبران راکا (Gibran Rakabuming Raka) سابق
صدر جوکو ویدودو (Joko Widodo) کے
بیٹے ہیں۔ وہ گزشتہ ماہ آئینی عدالت اور سپریم کورٹ کے فیصلوں کے بعد سے ارکان
پارلیمنٹ کی سخت تنقید کی زد میں تھے، عدالتوں کے مطابق ان کی تعلیمی اسناد
انتخابی اہلیت کے تقاضے پورے نہیں کرتی تھیں۔ رائٹرز
کے مطابق جبران (Gibran Rakabuming Raka) کے
معاون بودی آریے سیتیادی (Budi Arie Setiadi) نے
بتایا کہ نائب صدر نے بدھ کی صبح صدر کو اپنا استعفیٰ پیش کیا۔ پارلیمنٹ کے ایوان
بالا کے دو ذرائع نے بھی بتایا کہ جبران جمعرات کی صبح اپنا استعفیٰ باضابطہ طور
پر ایوان بالا میں جمع کرائیں گے۔
انڈونیشیا کے سینئر وزیر قانون یوسرل احزا مہندرا (Yusril Ihza
Mahendra) کے مطابق استعفیٰ جمع ہونے کے بعد ایوان بالا کا اجلاس بلایا جائے
گا، جس میں نائب صدر کا عہدہ خالی قرار دینے کا عمل شروع ہوگا۔ اس کے بعد ایوان
بالا صدر کو خط لکھ کر متبادل نائب صدر کے لیے دو نام تجویز کرنے کی درخواست کرے
گا، جبکہ 60 دن کے اندر نئے نائب صدر کا انتخاب کیا جائے گا۔ دوسری
جانب بدھ کے روز مختلف سیاسی جماعتوں سے تعلق رکھنے والے تقریباً 120 ارکان
پارلیمنٹ نے جبران (Gibran) کے مواخذے کا
مطالبہ کرتے ہوئے درخواست جمع کرائی۔ درخواست پر دستخط کرنے والے رکن پارلیمنٹ
مردانی علی سیرا (Mardani Ali Sera) کا
کہنا تھا کہ جبران (Gibran) اب آئین میں نائب صدر کے لیے مقررہ اہلیت پر
پورا نہیں اترتے۔ جبران
(Gibran)
کی تعلیمی اسناد پر تنازع اس وقت شدت اختیار کرگیا جب سپریم کورٹ نے
وزارت تعلیم کو ان کی تعلیمی مساوات کا سرٹیفکیٹ واپس لینے کی ہدایت کی، جسے عدالت
پہلے ہی کالعدم قرار دے چکی تھی۔ جبران نے بیرون ملک تعلیم حاصل کی تھی اور 2024
کے صدارتی انتخابات میں حصہ لینے کے لیے اسی سرٹیفکیٹ کو تعلیمی اہلیت کے ثبوت کے
طور پر استعمال کیا تھا۔
انڈونیشیا کے انتخابی قانون کے تحت نائب صدر کے امیدوار کے لیے ہائی
اسکول یا اس کے مساوی تعلیم مکمل کرنا ضروری ہے، تاہم عدالت کے مطابق ایسا کوئی
ثبوت نہیں ملا جس سے ثابت ہو کہ جبران کے پاس بیرون ملک کی کوئی ایسی ڈگری یا سند
موجود تھی جس کی بنیاد پر انہیں ہائی اسکول کے مساوی تعلیمی قابلیت کا سرٹیفکیٹ
جاری کیا جا سکتا۔ سپریم
کورٹ نے اپنے فیصلے میں آئینی عدالت کے اس حکم کو بھی مدنظر رکھا جس میں کہا گیا
تھا کہ جبران (Gibran)
کی تعلیمی دستاویزات انتخابی تقاضوں پر پوری نہیں اترتیں۔ اس سے قبل 2024 کے
انتخابات میں ان کی صدارتی امیدوار کی حیثیت بھی اخلاقی اعتراضات کی زد میں آئی
تھی، کیونکہ اس وقت ان کے چچا کی سربراہی میں آئینی عدالت نے عمر کی حد میں تبدیلی
کی تھی، جس کے باعث وہ انتخاب لڑنے کے اہل ہوگئے تھے۔ جبران (Gibran) کا
استعفیٰ ایسے وقت میں سامنے آیا ہے جب صدر پرابوو سوبیانتو اور سابق صدر جوکو
ویدودو (Joko
Widodo) کے درمیان
سیاسی اتحاد میں اختلافات کے آثار نمایاں ہو رہے ہیں۔ جوکو ویدودو، (Joko Widodo) جنہیں جوکووی (Kowi)
بھی
کہا جاتا ہے، دو مرتبہ صدارتی انتخابات میں پرابوو (Prabowo Subianto) کو
شکست دے چکے تھے، تاہم آئینی مدت پوری ہونے کے بعد انہوں نے 2024 میں ان کی حمایت
کی تھی۔
گزشتہ ہفتے صدر پرابوو (Prabowo Subianto) نے
اپنے چیف آف اسٹاف کو بھی عہدے سے برطرف کردیا تھا، جنہیں جوکووی کا قریبی ساتھی
سمجھا جاتا تھا۔ انہیں صدر سمیت دیگر شخصیات کی جاسوسی کے الزامات میں گرفتاری کے
بعد عہدے سے ہٹایا گیا۔ سیاسی
تجزیہ کاروں کے مطابق حکمران اتحاد میں اختلافات کھل کر سامنے آنے سے حکومت کو
مزید عدم استحکام کا سامنا ہوسکتا ہے۔ حکومت پہلے ہی مفت اسکول کھانوں کے پروگرام
سے متعلق تنازعات، معاشی پالیسیوں پر سوالات اور مالیاتی منصوبوں کے حوالے سے دباؤ
کا سامنا کر رہی ہے۔ آسٹریلین
نیشنل یونیورسٹی کی محقق ثنا جعفری کے مطابق یہ بحران ظاہر کرتا ہے کہ ملک کی مؤثر
اور مستحکم حکمرانی کی ضرورت کے مقابلے میں چند بااثر سیاسی شخصیات کے مفادات کو
ترجیح دی جا رہی ہے۔ ان کا کہنا تھا کہ اعلیٰ سطح پر طویل غیر یقینی صورتحال ملک
کے اندر اور بیرون ملک مستقبل کے حوالے سے تشویش میں مزید اضافہ کرے گی۔