روس میں ہولناک برفانی تودہ گرنے سے 11 کوہ پیماؤں کی موت، 6 لاپتہ

روس کے شمالی قفقاز کے علاقے کباردینو بالکاریا میں ایک بڑے برفانی تودے کی زد میں آنے سے 11 کوہ پیماؤں کی موت ہوگئی، جبکہ 6 دیگر لاپتا بتائے جا رہے ہیں۔ خراب موسم، دشوار گزار پہاڑی علاقے اور مزید برفانی تودے گرنے کے خطرے کے باعث تلاش اور بچاؤ کی کارروائیوں میں شدید مشکلات پیش آ رہی ہیں۔ مقامی ہنگامی خدمات کے حوالے سے چینی خبر رساں ایجنسی ژنہوا نے پیر کو بتایا کہ حادثہ اتوار کو مقامی وقت کے مطابق شام تقریباً 5 بجے بیزنگی گھاٹی میں پیش آیا۔ بتایا گیا ہے کہ 5,025 میٹر بلند ماؤنٹ مژیرگی سے ایک بڑا برفانی تودہ نیچے آیا اور 33 کوہ پیماؤں پر مشتمل ایک گروپ اس کی زد میں آگیا۔

روسی خبر رساں ایجنسی تاس کے مطابق حادثے کے فوراً بعد امدادی ٹیموں کو جائے وقوعہ روانہ کیا گیا اور ایک ایم آئی-8 ہیلی کاپٹر بھی تلاش اور بچاؤ کی کارروائی میں شامل ہوا۔ تین افراد کو بحفاظت نکال کر نالچک منتقل کیا گیا۔ ہنگامی خدمات کے مطابق پیر کی صبح 9 بجے تک 10 کوہ پیما خود پہاڑ سے نیچے اترنے میں کامیاب ہوگئے تھے، تاہم 6 افراد کے بارے میں کوئی اطلاع نہیں مل سکی تھی۔ حادثے کے بعد بڑے پیمانے پر تلاش اور بچاؤ کا آپریشن شروع کیا گیا، جس میں 50 سے زیادہ ہنگامی کارکن حصہ لے رہے ہیں۔

حکام کے مطابق دشوار گزار جغرافیائی حالات کے علاوہ دوبارہ برفانی تودہ گرنے کا خدشہ امدادی کارروائیوں میں سب سے بڑی رکاوٹ بنا ہوا ہے۔ خراب موسم بھی امدادی ٹیموں کی نقل و حرکت اور فضائی کارروائیوں کو متاثر کر رہا ہے۔

یہ رواں سال کوہ پیماؤں کی بڑی تعداد میں ہلاکت کا دوسرا بڑا واقعہ بتایا جا رہا ہے۔ اس سے قبل 30 جولائی کو پاکستان کے گلگت بلتستان میں قراقرم کے براڈ پیک پر کیمپ 2 اور کیمپ 3 کے درمیان برفانی تودہ گرنے سے 10 کوہ پیما ہلاک ہوگئے تھے۔ اس حادثے میں دنیا کے معروف کوہ پیما نرمل پرجا، جنہیں ’نِمز دائی‘ کے نام سے بھی جانا جاتا ہے، سمیت نیپال کے پانچ کوہ پیما شامل تھے۔ اس گروپ میں پاکستان، عمان، امریکہ اور چین کا ایک ایک کوہ پیما بھی شامل تھا۔ اس واقعے کو کوہ پیمائی کی دنیا کی حالیہ مہلک ترین قدرتی آفات میں سے ایک قرار دیا گیا تھا۔