رواں برس اگست 2026 دنیا کی تاریخ کا گرم ترین مہینہ قرار

غیر ملکی میڈیا کے مطابق رواں برس اگست دنیا کی تاریخ جولائی 2023 کے ساتھ مشترکہ طور پر گرم ترین مہینہ قرار پایا ہے۔  اس مہینے میں عالمی اوسط سطحی درجہ حرارت 16.96 ڈگری سینٹی گریڈ ریکارڈ کیا گیا، جو 1991 سے 2020 کے اوسط درجہ حرارت کے مقابلے میں 0.85 فیصد زیادہ ہے۔ یورپی یونین کی موسمیاتی نگرانی سروس کوپرنیکس Copernicus کے جاری کردہ اعداد وشمار کے مطابق رواں برس اگست کا درجہ حرارت صنعتی دور سے قبل 1850 سے 1900 کے اوسط کے مقابلے میں 1.65 ڈگری سینٹی گریڈ ریکارڈ کیا گیا۔

رپورٹ کے مطابق نومبر 2025 کے بعد یہ پہلا مہینہ ہے جب عالمی درجہ حرارت دوبارہ 1.5 ڈگری کی سطح سے اوپر پہنچا ہے۔ اگست میں صرف زمین میں میدانی علاقوں کا ہی نہیں بلکہ برف سے ڈھکے قطبی علاقوں اور سمندروں کا اوسط سطحی درجہ حرارت میں بھی اضافہ ریکارڈ کیا گیا اور اوسط سطحی درجہ حرارت 21.07 ڈگری سینٹی گریڈ تک پہنچ گیا۔

رپورٹ میں 24 اور 25 اگست کو سمندری درجہ حرارت کی روزانہ اوسط 21.11 ڈگری سینٹی گریڈ تک پہنچ گئی جو اب تک کی بلند ترین سطح ہے۔ کوپرنیکس کی رپورٹ میں کہا گیا ہے کہ جون سے اگست 2026 تک کا عالمی موسمِ گرما بھی ریکارڈ کے اعتبار سے مشترکہ طور پر گرم ترین رہا، جبکہ مغربی یورپ میں تاریخ کا گرم ترین موسم گرما رہا، جس نے 2003 کا سابقہ ریکارڈ توڑ دیا۔ گرمی کی لہر کے ساتھ برطانیہ، فرانس، ہنگری، رومانیہ اور سربیا سمیت کئی علاقوں میں شدید خشک سالی بھی ریکارڈ کی گئی اور ہزاروں ہلاکتیں بھی ہوئیں۔