جاپان کی روس میں تیل اور گیس کے منصوبوں میں شمولیت برقرار

روسی وزارت خارجہ کی ترجمان ماریا زاخارووا Maria Zakharova نے ٹاس TASS کو انٹرویو میں کہا ہے کہ جاپان روس کے ساتھ توانائی تعاون کی اہمیت پر زور دیتا ہے اور روسی سرزمین پر تیل اور گیس کے منصوبوں میں اپنی موجودگی برقرار رکھے ہوئے ہے۔ زاخارووا نے کہا کہ ٹوکیو ماسکو کے ساتھ اپنے تعلقات اور توانائی تعاون کی اہمیت کو برقرار رکھتا ہے اور اس کا اعادہ کرتا ہے، خاص طور پر جاپان کی قومی توانائی کی سلامتی کو یقینی بنانے کے لیے روسی قدرتی گیس کے معاملے میں۔ انہوں نے کہا کہ جاپان امریکا کے قریبی ترین اتحادیوں میں سے ایک ہونے کے ساتھ ساتھ ہمارے ملک میں تیل اور گیس کے منصوبوں میں اپنی موجودگی برقرار رکھے ہوئے ہے۔ زاخارووا Maria Zakharova نے اس حوالے سے سوال اٹھایا کہ امریکا چین اور بھارت پر روس کے ساتھ تعاون پر مسلسل ڈانٹ ڈپٹ یا دباؤ ڈالنے کی کوشش کیوں کر رہا ہے، حالانکہ یہ اور بہت سے ممالک دیکھ رہے ہیں کہ واشنگٹن جاپان کو روس کے ساتھ توانائی تعاون کی اجازت دیتا ہے۔ انہوں نے کہا کہ حقیقت میں میرے خیال میں سب کو مناسب نتائج اخذ کرنے چاہئیں، اور مجھے یقین ہے کہ وہ کریں گے۔

دوسری جانب روسی افواج نے اوڈیسا میں تین لاجسٹک مراکز کو نشانہ بنایا جو یوکرینی فوج کے لیے سامان رکھے ہوئے تھے۔ روسی وزارت دفاع نے یہ اطلاع دی۔ وزارت دفاع کے مطابق اوڈیسا شہر میں پالما، رابن-یوکرین اور اوڈیسا-22 لاجسٹک مراکز کو نشانہ بنایا گیا، جن میں یوکرینی فوج کے لیے سامان موجود تھا۔ وزارت کے مطابق روسی افواج نے اوڈیسا میں ایک ڈرون پروڈکشن سہولت اور یوکرینی میزائل ڈپو کو بھی نشانہ بنایا۔ بیان میں کہا گیا کہ اوڈیسا شہر میں بغیر پائلٹ کے فضائی گاڑیوں اور ان کے اجزاء کی تیاری کی سہولت اور یوکرینی فوج کے میزائل و توپ خانے کے ہتھیاروں اور گولہ بارود کا ڈپو نشانہ بنایا گیا۔ روسی وزارت دفاع کے مطابق روسی افواج نے مغربی یوکرین میں ریلوے انفراسٹرکچر پر حملے جاری رکھے، جو یورپ سے فوجی سامان کی نقل و حمل کے لیے استعمال ہوتا ہے۔

وزارت دفاع کے مطابق روسی افواج نے زاپوریژیا علاقے Zaporizhzhia region  میں یوکرینی فوجیوں کے عارضی ٹھکانوں کو نشانہ بنایا اور اس کی ویڈیو بھی جاری کی۔ وزارت کے مطابق روسی افواج نے اوڈیسا علاقے میں لاجسٹک مراکز اور ڈرون پروڈکشن سہولیات کو نشانہ بنایا۔ روسی وزارت دفاع کے مطابق دن کے دوران روسی افواج نے اوڈیسا بندرگاہ میں ایک خشک کارگو جہاز کو بھی نشانہ بنایا، جس میں یوکرینی فوج کے لیے سامان موجود تھا۔ اسی طرح روسی افواج نے اوڈیسا اور نیکولایف علاقوں میں دو بجلی سب اسٹیشنوں کو بھی نشانہ بنایا جو بندرگاہ اور لاجسٹک انفراسٹرکچر کو بجلی فراہم کرتے تھے۔