عمران خان کی حمایت میں آسٹریلیا کے سات سابق کرکٹ کپتانوں نے وزیر خارجہ پینی وونگ کو خط لکھا

پاکستان کے سابق کپتان اور سابق وزیر اعظم عمران خان کی حمایت میں اب آسٹریلیا کے سابق کرکٹرز بھی آ گئے ہیں۔ آسٹریلیا کے 7 سابق کپتانوں نے پاکستان میں قید عمران خان کے علاج، اہل خانہ سے ملاقات اور قانونی مشیروں تک رسائی کے معاملے پر تشویش کا اظہار کیا ہے۔ ان سابق کپتانوں نے آسٹریلیا کی وزیر خارجہ پینی وونگ کو خط لکھ کر انسانی بنیادوں پر اس معاملے میں مداخلت کی اپیل کی ہے۔ اس خط پر آسٹریلیا کے سابق کپتان ایلن بارڈر، گریگ چیپل، ایان چیپل، بیلنڈا کلارک، کِم ہیوز، مارک ٹیلر اور اسٹیو وا کے دستخط ہیں۔

سابق آسٹریلوی کپتانوں نے اپنی اپیل میں واضح کیا ہے کہ ان کا مقصد عمران خان کے خلاف جاری قانونی یا سیاسی معاملات پر کوئی رائے دینا نہیں ہے۔ ان کی توجہ صرف ایک قیدی کے طور پر عمران خان کے ساتھ ہونے والے سلوک اور ان کی بنیادی انسانی ضروریات پر ہے۔ ان تجربہ کار کرکٹرز نے عمران خان کی صحت، انہیں ملنے والی طبی سہولیات، اہل خانہ سے رابطے اور قانونی مشورہ حاصل کرنے تک رسائی کے حوالے سے تشویش ظاہر کی ہے۔ ان کا کہنا ہے کہ یہ معاملہ کسی شخص کے سیاسی نظریے یا عہدے سے بڑھ کر انسانی وقار سے جڑا ہوا ہے۔