روسی وزارت خارجہ کی ترجمان ماریہ زخارووا (Maria Zakharova) نے غزہ میں اسرائیلی حملوں اور معصوم شہریوں کی
ہلاکتوں پر گہری تشویش کا اظہار کیا ہے، جبکہ پاکستان اور روس کے دوطرفہ تعلقات پر
جلد تفصیلی معلومات فراہم کرنے کی یقین دہانی بھی کرائی ہے۔ ماسکو میں روسی وزارت خارجہ کی ہفتہ وار پریس بریفنگ کے دوران دنیا
نیوز کے نمائندے شاہد گھمن نے پاکستان کے وزیراعظم محمد شہباز شریف کے ماہِ دسمبر
کے آغاز میں متوقع دورۂ ماسکو اور روسی صدر ولادیمیر پوتن سے ممکنہ ملاقات کے
حوالے سے سوال کیا۔ انہوں نے پوچھا کہ روس وزیراعظم کے اس متوقع دورے سے کیا توقعات
رکھتا ہے اور تجارت، توانائی، سرمایہ کاری اور دیگر اہم شعبوں میں کون سے نئے
معاہدے زیرِ غور ہیں؟ اس کے جواب میں ماریہ زخارووا (Maria Zakharova) نے کہا کہ اعلیٰ سطح کے مذاکرات کے شیڈول اور
ایجنڈے سے متعلق معلومات روسی صدارتی انتظامیہ کی جانب سے جلد فراہم کی جائیں گی،
اور پاکستان و روس کے دوطرفہ تعلقات کے حوالے سے متعلقہ مواد بھی جلد بھجوا دیا
جائے گا۔
اسی بریفنگ کے دوران دنیا نیوز کے نمائندے نے غزہ کی پٹی میں جنگ
بندی کے باوجود جاری اسرائیلی حملوں اور شہریوں کی ہلاکتوں پر بھی موثر سوال کیا۔ اس پر ماریہ زخارووا نے جواب دیا کہ وہ بریفنگ کے آغاز میں ہی غزہ
کی صورتحال، جاری انسانی المیے اور درکار اقدامات پر روسی مؤقف تفصیل سے پیش کر
چکی ہیں۔ بریفنگ کے آغاز میں ان کا کہنا تھا کہ اکتوبر 2025 میں اسرائیل
اور حماس کے درمیان طے پانے والی جنگ بندی اور قیدیوں کے تبادلے کے معاہدے سے جنگ
کے شدید مرحلے کا خاتمہ تو ہوا تھا، تاہم ایک سال گزرنے کے باوجود ان معاہدوں پر
عملی عمل درآمد میں کوئی نمایاں پیش رفت نہیں ہو سکی۔ انہوں نے مزید کہا کہ امریکی
صدر ڈونلڈ ٹرمپ کا امن منصوبہ، جو اس معاہدے کی اساس بنا تھا، اب تک محض کاغذوں تک
محدود ہے، جبکہ اقوام متحدہ کی سلامتی کونسل کی متعلقہ قراردادوں پر بھی خاطر خواہ
عمل درآمد نہیں ہو سکا۔