کراچی: 24 پی ٹی آئی کارکن گرفتار، 100 سے 150 نامعلوم افراد کے خلاف مقدمہ درج

کراچی: پولیس نے کراچی کے علاقے آرٹلری میدان میں پاکستان تحریک انصاف (پی ٹی آئی) کے کارکنوں کے خلاف کارروائی کرتے ہوئے 24 کارکنوں کو گرفتار کرلیا، جبکہ 100 سے 150 نامعلوم افراد کے خلاف مقدمہ درج کرلیا گیا۔ پولیس کے مطابق سرکار کی مدعیت میں مقدمہ نمبر 56/2026 درج کیا گیا ہے، جس میں پاکستان پینل کوڈ کی دفعات 147، 149، 186 اور 188 شامل کی گئی ہیں۔

ایف آئی آر کے مطابق پی ٹی آئی کارکنان، جن کی قیادت علیم عادل شیخ کر رہے تھے، فوراہ چوک سے کراچی پریس کلب کی جانب مارچ کر رہے تھے۔ مظاہرین کے ہاتھوں میں بینرز اور ڈنڈے موجود تھے۔ پولیس کا کہنا ہے کہ سیکیورٹی اہلکاروں نے ریلی کو روکنے کی کوشش کی اور شرکا کو آگاہ کیا کہ سندھ حکومت کی جانب سے ریڈ زون میں دفعہ 144 نافذ ہے۔ پولیس کے مطابق مظاہرین مبینہ طور پر مشتعل ہوگئے اور سرکاری اہلکاروں کو فرائض کی انجام دہی سے روکنے کے لیے مزاحمت کی۔ پولیس نے واقعے کی مزید تحقیقات شروع کردی ہیں، جبکہ دیگر نامعلوم افراد کی شناخت اور گرفتاری کے لیے کارروائیاں جاری ہیں۔