پاکستان کی پہلی چاند گاڑی کا نام جناح-1 رکھ دیا گیا

پاکستان کی خلائی تحقیقاتی ایجنسی سپارکو نے ملک کی پہلی قمری گاڑی کا سرکاری نام جناح-1 رکھنے کا اعلان کر دیا ہے۔ سپارکو کے مطابق یہ نام ملک گیر مقابلے کے ذریعے منتخب کیا گیا، جس میں پاکستان بھر سے 4 ہزار سے زائد تجاویز موصول ہوئیں۔ جناح-1‘‘ نام سات شرکاء نے تجویز کیا تھا۔ حکام کے مطابق فاتح کا انتخاب قرعہ اندازی کے ذریعے کیا گیا، جس میں بہاول نگر سے تعلق رکھنے والے 17 سالہ طیب کریم کو فاتح قرار دیا گیا۔

تقریب سے خطاب کرتے ہوئے سپارکو کے چیئرمین نے کہا کہ ’’جناح-1‘‘ کا نام بانیٔ پاکستان قائداعظم محمد علی جناح کو خراجِ عقیدت پیش کرتا ہے۔ انہوں نے کہا کہ یہ نام پاکستان کے عزم، ترقی اور خلاء میں نئی حدود تلاش کرنے کی خواہش کی بھی علامت ہے۔ سپارکو کے مطابق پاکستان کا پہلا قمری روور 2029 میں چین کے چانگ ای-8 مشن کے ذریعے چاند پر بھیجا جائے گا۔ جناح-1 چاند کے جنوبی قطب پر سائنسی تحقیق کرے گا۔ پاکستان میں تیار کیا جانے والا یہ قمری روور پلازما، تابکاری اور چاند کی سطح و جغرافیہ کا مطالعہ کرے گا۔ اس کے علاوہ یہ مستقبل میں قمری تحقیق اور چاند پر انسانی موجودگی کے امکانات سے متعلق اہم تجربات میں بھی کردار ادا کرے گا۔سپارکو کا کہنا ہے کہ جناح-1 پاکستان کے خلائی تحقیق کے سفر میں ایک اہم سنگِ میل ثابت ہوگا اور ملک میں سائنسی و تکنیکی ترقی کے لیے نئی راہیں کھولنے میں مدد دے گا۔