ایران میں سپریم لیڈر سے ایٹم بم بنانے کی اجازت مانگ لی گئی

ایران کے رکن پارلیمنٹ محمود نبویان نے سپریم لیڈر مجتبیٰ خامنہ ای سے مطالبہ کیا ہے کہ ملک کو ایٹمی ہتھیار تیار کرنے کی اجازت دی جائے۔ ان کا کہنا ہے کہ انہوں نے یہ تجویز شہر قم میں منعقدہ ایک اجتماع کے دوران پیش کی، جہاں شرکا کی جانب سے اس کی حمایت کی گئی۔

الجزیرہ کے مطابق محمود نبویان نے سماجی رابطے کی ویب سائٹ ایکس پر جاری بیان میں بتایا کہ انہوں نے اجتماع میں ایران کی جوہری پالیسی پر نظرثانی اور ایٹم بم بنانے کی اجازت دینے کا معاملہ اٹھایا تھا۔ یہ مطالبہ ایسے وقت سامنے آیا ہے جب ایران کے بعض ارکان پارلیمنٹ کی جانب سے ملک کی جوہری پالیسی تبدیل کرنے کی آوازیں بلند ہو رہی ہیں۔ ایران طویل عرصے سے مؤقف اختیار کرتا آیا ہے کہ اس کا جوہری پروگرام پُرامن مقاصد کے لیے ہے اور وہ ایٹمی ہتھیار بنانے کا ارادہ نہیں رکھتا۔ ایران کے سابق سپریم لیڈر علی خامنہ ای نے بھی جوہری ہتھیاروں کی تیاری کے خلاف مذہبی فتویٰ جاری کیا تھا، جسے تہران اپنی جوہری پالیسی کی بنیاد قرار دیتا رہا ہے۔

دوسری جانب ایران کی سپریم نیشنل سکیورٹی کونسل کے سیکریٹری محسن رضائی نے گزشتہ ستمبر میں الجزیرہ کو انٹرویو دیتے ہوئے کہا تھا کہ ایران اب بھی اس مذہبی فیصلے کا پابند ہے اور جوہری پالیسی میں کوئی تبدیلی نہیں ہوئی۔ تاہم مستقبل کے حوالے سے انہوں نے غیر یقینی کا اظہار کرتے ہوئے کہا تھا کہ آگے کیا ہوگا، اس بارے میں کچھ نہیں کہا جا سکتا۔ محمود نبویان کا تازہ بیان ایران میں جوہری ہتھیاروں کی تیاری کے حوالے سے جاری بحث کو ایک بار پھر سامنے لے آیا ہے۔ تاہم ان کا مطالبہ ایران کی جانب سے ایٹم بم بنانے کا باضابطہ فیصلہ یا اعلان نہیں ہے۔