انڈونیشیا کے جزیرے بورنیو Borneoمیں جنگلات، دلدلی علاقوں اور پیٹ کی تہوں میں لگی
آگ نے فضائی آلودگی کے سنگین بحران کو جنم دے دیا ہے۔ کئی ماہ سے جاری آتش زدگی کے
باعث اٹھنے والے زہریلے دھوئیں نے نہ صرف انڈونیشیا بلکہ سنگاپور، ملائیشیا اور
فلپائن کے بعض علاقوں کو بھی متاثر کیا ہے۔ سیٹلائٹ ڈیٹا کے مطابق رواں سال کے
آغاز سے اب تک انڈونیشیا میں تقریباً 19 لاکھ ہیکٹر رقبہ آگ کی نذر ہو چکا ہے،
جبکہ صرف ستمبر میں تقریباً 10 لاکھ ہیکٹر رقبے پر آگ پھیلنے کا اندازہ ہے۔
انڈونیشیا کی وزارت صحت کے مطابق اکتوبر کے وسط تک
کھانسی اور سانس کی شدید بیماریوں کے 2 لاکھ 77 ہزار سے زائد کیسز رپورٹ ہو چکے
تھے، جن میں 5 سال سے کم عمر 62 ہزار سے زیادہ بچے شامل ہیں۔ وسطی کلیمانتن کے شہر
پالانگ کارایا Palangkaraya میں رہنے والے شہری زہریلی دھند کے باعث شدید مشکلات کا سامنا کر رہے
ہیں۔ 3 بچوں کی ماں دیانیرا ایکا نستیتی Dianyra Eka
Nastitiکے مطابق ان کی کم عمر
بچی کو ڈیڑھ ماہ کی عمر میں پھیپھڑوں کے انفیکشن کے باعث اسپتال میں داخل کرانا
پڑا تھا، اور اب بھی وہ ہر رات اس کی صحت کے حوالے سے فکرمند رہتی ہیں۔ مقامی
شہریوں کا کہنا ہے کہ مسلسل دھوئیں کے باعث بچوں میں کھانسی اور سانس کی بیماریاں
بڑھ رہی ہیں۔ ماہرین کے مطابق دھوئیں میں موجود انتہائی باریک ذرات پھیپھڑوں کی
گہرائی تک پہنچ کر سوزش، پھیپھڑوں کی دائمی بیماریوں اور قبل از وقت موت کے خطرے
میں اضافہ کر سکتے ہیں۔ بچے، بزرگ اور حاملہ خواتین اس آلودگی سے زیادہ متاثر ہونے
کا خدشہ رکھتے ہیں۔
حکومت نے آگ بجھانے کے لیے فضائی کارروائیوں، پانی
کے چھڑکاؤ اور موسم میں مصنوعی تبدیلی سمیت متعدد اقدامات کیے ہیں۔ گزشتہ ہفتے
حکام نے دعویٰ کیا کہ آگ پر قابو پانے کے لیے 60 ہزار سے زائد اہلکار تعینات کیے
گئے اور نئی لگنے والی آگ بجھانے میں 80 فیصد کامیابی حاصل ہوئی۔ تاہم امدادی
کارکنوں کو شدید مشکلات درپیش ہیں۔ پیٹ کی زمین میں لگنے والی آگ سطح پر بجھنے کے
باوجود زیرِ زمین دبی رہتی ہے اور دوبارہ بھڑک اٹھتی ہے۔ فائر فائٹر فوزی رحمان کے
مطابق عام زمین پر ایک دن میں 20 ہیکٹر رقبے کی آگ بجھائی جا سکتی ہے، لیکن پیٹ کی
زمین میں آگ بجھانے کے لیے پانی کو گہرائی تک پہنچانا پڑتا ہے، جس میں کئی ماہ لگ
سکتے ہیں۔ طویل خشک سالی نے پانی کی قلت پیدا کرکے امدادی کارروائیوں کو مزید مشکل
بنا دیا ہے۔
ماہرین کے مطابق رواں سال شدید موسمیاتی تبدیلیوں
کے تناظر میں پیدا ہونے والی سپر ال نینو کی صورت حال نے خشک سالی میں اضافہ کیا
اور بارشوں میں تاخیر کی، جس سے آگ بجھانے میں مشکلات بڑھ گئیں۔ جنگلات اور پیٹ کی
زمینوں کے تحفظ پر کام کرنے والی ماہر ڈاکٹر نِسا نوویتا Dr.
Nisa Novita نے خبردار کیا ہے کہ آگ اب ان علاقوں تک بھی پھیل رہی ہے جہاں ماضی میں
ایسی آتش زدگی نہیں دیکھی گئی۔ دوسری جانب دھوئیں کے باعث شہریوں کو گھروں تک
محدود رہنے، بچوں کی تعلیم آن لائن جاری رکھنے اور روزگار کے حصول میں مشکلات کا
سامنا ہے۔ دیہی علاقوں کے کسان، دیہاڑی دار مزدور اور چھوٹے کاروباری افراد یا تو
کام چھوڑنے پر مجبور ہیں یا زہریلی فضا میں کام کرکے اپنی صحت خطرے میں ڈال رہے
ہیں۔