امریکا میں طوفان کے شدید خطرے کے پیش نظر نیویارک اور نیو جرسی میں ہنگامی حالت نافذ کر دی گئی ہے۔
امریکا میں طوفان کے شدید خطرے کے پیش نظر نیویارک اور نیو جرسی میں ہنگامی حالت نافذ کر دی گئی ہے۔ امریکا میں ’’نور ایسٹر‘‘ نامی طاقتور طوفان کے باعث نیویارک سے واشنگٹن ڈی سی تک ساحلی علاقوں میں شدید بارش، سیلاب، تیز ہواؤں اور بلند لہروں کا خطرہ پیدا ہوگیا ہے، جبکہ بجلی کی فراہمی اور سفری نظام بھی متاثر ہونے کا خدشہ ہے۔ نیویارک کے تینوں بڑے ہوائی اڈوں سے پروازوں کا نظام متاثر ہونے کا بھی خدشہ ظاہر کیا گیا ہے۔
محکمہ موسمیات نے خبردار کیا ہے کہ طوفان ہفتے کے اختتام پر مشرقی ساحل سے ٹکرائے گا اور ریاست مین سے واشنگٹن ڈی سی تک مختلف علاقوں کو متاثر کرسکتا ہے۔بعض علاقوں میں ہواؤں کی رفتار 55 میل فی گھنٹہ، یعنی تقریباً 89 کلومیٹر فی گھنٹہ تک پہنچنے کا امکان ہے، جس کے باعث ڈرائیونگ بھی مشکل ہوسکتی ہے۔ نیویارک کی گورنر کیتھی ہوکل نے شہریوں کو طوفان کو سنجیدگی سے لینے کی ہدایت کرتے ہوئے کہا کہ متاثرہ علاقوں میں ہنگامی صورتحال سے نمٹنے کے لیے اقدامات کیے جارہے ہیں۔ جبکہ نیویارک سٹی حکام نے بھی شہریوں کو ممکنہ تہہ خانوں میں پانی بھرنے، بجلی کی بندش اور سفری مشکلات سے خبردار کیا ہے۔
