اقوامِ متحدہ کے سربراہ انتونیو گوتریس کا الوداعی خطاب

انتونیو گوتریس نے COP31میں اپنی آخری پریس کانفرنس کے دوران بطور اقوامِ متحدہ کے سیکرٹری جنرل اپنے تقریباً ایک دہائی پر محیط دورِ اقتدار کا جذباتی انداز میں جائزہ لیا، جو اگلے ماہ ختم ہونے جا رہا ہے۔ تالیوں کی گونج کو عاجزی سے روکتے ہوئے، انتونیو گوتریس نے ماحولیاتی بحران کے معاملے پر خود کو ایک عاجز مگر مستقل مزاج سچ بولنے والا قرار دیا۔ انہوں نے کہا، ’’میں نے موسمیاتی تبدیلی کے بارے میں سچ بولنے کی کوشش کی ہے۔ بعض اوقات وہ سچ ناگوار رہا ہے۔ بعض اوقات اسے ناپسند کیا گیا ہے۔ لیکن میری ذمہ داری کبھی یہ نہیں رہی کہ حقائق کو دوسروں کی سہولت کے مطابق ڈھالوں، بلکہ میری ذمہ داری سائنس پر مبنی سچ بتانا رہی ہےاور خاص طور پر اس وقت واضح بات کرنا جب سچ کڑوا ہو۔‘‘ انتونیو گوتریس نے کہا کہ حقیقت یہ ہے کہ ماحولیاتی بحران خطرناک حد تک قابو سے باہر ہوتا جا رہا ہے، جسے روکنے کیلئے ممالک کو ہر محاذ پر اپنی کوششیں تیز کرنے کی ضرورت ہے۔ انہوں نے نشاندہی کی کہ ان کے دور میں موسمیاتی تبدیلی ’’اقوامِ متحدہ کے ہر کام کا مرکزی حصہ‘‘ بن گئی ہے، جو تنازعات سے لے کر غربت میں کمی تک ہر چیز پر اثر انداز ہو رہی ہے۔ انہوں نے کہا، ’’انطالیہ سے رخصت ہوتے ہوئے میرا پیغام سادہ ہے، حقائق کا سامنا کریں۔ سائنس کی پیروی کریں۔ مستقبل کا انتخاب کریں اور کبھی ہمت نہ ہاریں۔ ‘‘

پریس کانفرنس کے دوران، انتونیو گوتریس نے صحافیوں کے سوالات کے جوابات بھی دئیے، جن میں فیونا ہاروی  (Fiona Harvey) کا ایک سوال بھی شامل تھا، جنہوں نے پوچھا کہ کیا انہیں ماحولیاتی اقدامات کیلئے کھل کر آواز اٹھانے پر کوئی پچھتاوا ہے؟ انہوں نے جواب دیا، ’’میں اسے بے باک یا حد سے زیادہ بولنا نہیں سمجھتا، میں بس وہی کہتا ہوں جو سچ ہے۔‘‘ اس کے بعد انہوں نے عوام، سول سوسائٹی، حکومتوں اور اداروں میں ماحولیاتی بحران کے خطرات کے حوالے سے بڑھتی ہوئی آگاہی پر جذباتی انداز میں بات کی۔ انہوں نے کہا، ’’عوامی رائے، سول سوسائٹی اور متعدد حکومتوں و اداروں کے عزم میں یہ احساس اور ضمیر بیدار ہو رہا ہے کہ ہم اب بھی تباہی کے راستے پر گامزن ہیں اور یہ شعور بھی بڑھ رہا ہے کہ میں جو کچھ کہتا ہوں وہ محض لفاظی نہیں، بلکہ ایک انتہائی سادہ اور واضح حقیقت بیان کرنا ہے۔‘‘ اپنی الوداعی تقریر میں انتونیو گوتریس نے ایک اور سخت انتباہ جاری کرتے ہوئے کہا، ’’آپ جلتے ہوئے سیارے پر امن قائم نہیں کر سکتے۔‘‘

سبکدوش ہورہے اقوامِ متحدہ کے سربراہ نے اپنے دورِ اقتدار میں ہونے والی پیش رفت کو اجاگر کرتے ہوئے ماحولیاتی سائنس کے تقاضوں اور سیاسی لیڈروں کے اقدامات کے درمیان موجود بڑی خلا ء کی نشاندہی کی۔ انہوں نے کہا، ’’آپ جلتے ہوئے سیارے پر امن قائم نہیں کر سکتے۔ جب ماحولیاتی آفات لوگوں کو بار بار غربت میں دھکیل رہی ہوں تو آپ غربت کا خاتمہ نہیں کر سکتے۔ جس قدرتی نظام پر نوجوانوں کے بہتر مستقبل کا انحصار ہے، اسے تباہ کرتے ہوئے آپ ان سے بہتر مستقبل کا وعدہ نہیں کر سکتے اور جب اس بحران کو پیدا کرنے میں سب سے کم کردار ادا کرنے والے لوگ سب سے پہلے اور سب سے زیادہ متاثر ہو رہے ہوں، تو آپ انصاف کی سنجیدہ بات نہیں کر سکتے۔ ‘‘

انتونیو گوتریس نے مشترکہ میزبان ممالک ترکی اور آسٹریلیا کی جانب سے بجلی کے استعمال کو بڑھانے کی مہم کی بھی حمایت کی، تاہم اس بات پر زور دیا کہ یہ توانائی صاف اور ماحول دوست ہونی چاہئے۔ انہوں نے فوسل فیول (قدرتی ایندھن جیسے کوئلہ، تیل اور گیس) سے چھٹکارا پانے اور جنگلات کی کٹائی روکنے کیلئے کوپ ۳۰؍ کی صدارت کے تیار کردہ لائحہ عمل کی تعریف کی۔ انہوں نے ماحولیاتی مذاکرات میں فوسل فیول (Fossil Fuel)   لابی کے غیر متناسب اثر و رسوخ کو ختم کرنے کیلئے اقدامات کرنے کا بھی مطالبہ کیا۔ انہوں نے کہا، ’’ہمارے سیارے کے مستقبل کا سودا ان لوگوں کی شرائط پر نہیں کیا جا سکتا جو اس کی تباہی سے منافع کما رہے ہیں۔‘‘