اسپین کا یوکرین کے لیے 437 ملین یورو کے فوجی امدادی پیکج کا اعلان

میڈرڈ: اسپین نے روس کے ساتھ جاری جنگ کے دوران یوکرین کی دفاعی صلاحیت مضبوط بنانے کے لیے 437 ملین یورو مالیت کے نئے فوجی امدادی پیکج کا اعلان کر دیا ہے، جس کی مالیت تقریباً 490 ملین ڈالر بنتی ہے۔یوکرین کے صدر وولودیمیر زیلنسکی نے 5 نومبر 2026 کو میڈرڈ میں اسپین کے وزیراعظم پیڈرو سانچیز سے ملاقات کے بعد امدادی پیکج کی تصدیق کی۔ انہوں نے یوکرین کی مسلسل حمایت پر اسپین کا شکریہ ادا کرتے ہوئے کہا کہ ملاقات میں امداد کی تفصیلات اور ملک کی فوری دفاعی ضروریات پر تبادلہ خیال کیا گیا۔ اس امدادی پیکج کا مقصد یوکرین کو روسی میزائل اور ڈرون حملوں سے تحفظ فراہم کرنے کے ساتھ اس کی دیگر اہم دفاعی ضروریات پوری کرنے میں مدد دینا ہے۔ ملاقات کے دوران زیلنسکی نے اسپین کے وزیراعظم کو یوکرین کے توانائی کے نظام، بجلی کی ترسیل، پانی کی فراہمی، لاجسٹکس اور ریلوے نیٹ ورک کو روسی حملوں سے پہنچنے والے نقصان سے بھی آگاہ کیا۔

یوکرینی صدر کے مطابق رواں سال روسی حملوں میں یوکرین کے بڑی تعداد میں انجن اور ریلوے انجن تباہ یا متاثر ہوئے ہیں۔ ان کا کہنا تھا کہ گزشتہ برسوں کی مجموعی جنگ کے دوران بھی ریلوے نظام کو اس نوعیت کے نقصان کا سامنا نہیں کرنا پڑا۔ زیلنسکی نے دارالحکومت کیف کی صورتحال پر تشویش کا اظہار کرتے ہوئے کہا کہ ملک کے بجلی اور پانی کی فراہمی کے نظام مسلسل حملوں کی زد میں ہیں۔ ایسے حالات میں فوجی امداد کے ساتھ انسانی ہمدردی کی بنیاد پر تعاون بھی انتہائی اہمیت اختیار کر گیا ہے۔