خلائی مخلوق سے متعلق بابا وانگا کی پیشگوئی پھر زیرِ بحث، خلا سے پراسرار سگنل دریافت

بلغاریہ کی معروف نجومی بابا وانگا سے منسوب نومبر 2026 میں خلائی مخلوق کی زمین پر آمد کی پیشگوئی نے ایک بار پھر دنیا بھر میں لوگوں کی توجہ حاصل کرلی ہے۔ اس کی وجہ سائنسدانوں کی جانب سے خلا میں ایک پراسرار ریڈیو سگنل کی دریافت ہے، جس کے بعد انٹرنیٹ پر یہ بحث شروع ہوگئی ہے کہ کیا واقعی انسانوں کا کسی دوسری دنیا کی مخلوق سے سامنا ہونے والا ہے؟ بابا وانگا سے منسوب ایک پیشگوئی سوشل میڈیا پر گردش کر رہی ہے، جس میں دعویٰ کیا گیا ہے کہ نومبر 2026 کے دوران ایک بہت بڑا خلائی جہاز زمین کی فضا میں داخل ہوگا اور انسانوں کا پہلی مرتبہ خلائی مخلوق سے رابطہ قائم ہوسکے گا۔ تاہم اس پیشگوئی کی صداقت کے حوالے سے کوئی مستند تاریخی ثبوت موجود نہیں ہے۔

خلا میں سائنسدانوں کو کیا پراسرار چیز ملی؟

اس بحث کو مزید دلچسپ بنانے والا واقعہ چینی سائنسدانوں کی سربراہی میں کام کرنے والی ایک تحقیقی ٹیم کی جانب سے سامنے آیا ہے، جس نے زمین سے تقریباً 238 نوری سال کے فاصلے پر واقع ستاروں کے نظام کے ٹو 155 کی سمت سے ایک غیر معمولی ریڈیو سگنل دریافت کیا ہے۔ تحقیق کے مطابق یہ سگنل چین کی طاقتور ریڈیو دوربین فاسٹ کے پہلے سے محفوظ شدہ مشاہداتی اعداد و شمار کا جائزہ لینے کے دوران سامنے آیا۔ اس سگنل کی خاص بات یہ تھی کہ اس کی فریکوئنسی وقت کے ساتھ تبدیل ہورہی تھی، جس نے سائنسدانوں کی دلچسپی بڑھا دی۔

کیا نومبر میں واقعی خلائی مخلوق زمین پر پہنچے گی؟

خلا سے ملنے والے اس غیر معمولی سگنل اور بابا وانگا سے منسوب پیشگوئی کے درمیان تعلق جوڑنے کے باوجود سائنسدانوں نے واضح کیا ہے کہ اس دریافت کو خلائی مخلوق کی موجودگی کا ثبوت قرار نہیں دیا جاسکتا۔ مزید یہ کہ نومبر 2026 میں خلائی مخلوق کی آمد سے متعلق بابا وانگا کی جانب سے ایسی پیشگوئی کیے جانے کا کوئی مستند تاریخی ریکارڈ بھی دستیاب نہیں ہے۔ اس لیے سوشل میڈیا پر گردش کرنے والے دعوؤں کو حقیقت سمجھنا درست نہیں ہوگا۔ تحقیق کا ایک اہم پہلو یہ بھی ہے کہ مذکورہ ریڈیو سگنل نومبر 2026 میں موصول نہیں ہوا بلکہ اس کا سراغ 2021 میں ریکارڈ کیے گئے مشاہدات کے دوبارہ تجزیے کے دوران ملا۔ چنانچہ اس دریافت کو رواں ماہ خلائی مخلوق کی زمین پر آمد کا ممکنہ اشارہ قرار دینے کی کوئی سائنسی بنیاد موجود نہیں۔

بابا وانگا کی کون سی پیشگوئیاں مشہور ہیں؟

بابا وانگا کا اصل نام وانجیلیا پاندیوا گشترووا  Vangeliya Pandeva Gushterova تھا۔ وہ 1911 میں بلغاریہ میں پیدا ہوئیں اور 1996 میں انتقال کرگئیں۔ انہیں دنیا بھر میں بلقان کی نوسٹراڈیمس کے نام سے بھی جانا جاتا ہے، جبکہ ان سے منسوب پیشگوئیوں نے طویل عرصے سے لوگوں کی دلچسپی برقرار رکھی ہے۔ ان کے عقیدت مندوں کا دعویٰ ہے کہ انہوں نے اپنی زندگی میں مستقبل کے کئی اہم واقعات کی پیشگوئیاں کی تھیں، جن میں امریکا میں 11 ستمبر کے حملے، روسی آبدوز کرسک کا سمندر میں ڈوبنا، سابق بھارتی وزیراعظم اندرا گاندھی کا قتل اور باراک اوباما کا امریکی صدر منتخب ہونا شامل ہیں۔

یہ دعویٰ بھی کیا جاتا ہے کہ بابا وانگا نے اپنی موت کی تاریخ کے بارے میں بھی پہلے ہی بتا دیا تھا۔ تاہم ان سے منسوب ان پیشگوئیوں کی تاریخی حیثیت کی مستند تصدیق نہیں ہوسکی اور متعدد دعوے ان کے انتقال کے کئی برس بعد منظرِ عام پر آئے۔ یوں خلا میں پراسرار ریڈیو سگنل کی دریافت نے بابا وانگا سے منسوب پیشگوئی کو دوبارہ موضوعِ بحث ضرور بنا دیا ہے، لیکن فی الحال نہ تو خلائی مخلوق کی موجودگی کا کوئی ثبوت ملا ہے اور نہ ہی نومبر 2026 میں اس کی زمین پر آمد کے دعوے کی تصدیق ہوسکی ہے۔