ٹرمپ بمقابلہ ڈیموکریٹس، سیاسی انتقام سے دھمکیوں تک الزامات کی جنگ شدت اختیار کرگئی

امریکی صدر ڈونلڈ ٹرمپ نے ڈیموکریٹک رہنماؤں پر سیاسی مخالفت کی بنیاد پر ری پبلکنز کو نشانہ بنانے اور انہیں جیل بھجوانے کی دھمکیاں دینے کا الزام عائد کرتے ہوئے محکمہ انصاف کو متحرک کرنے کا اعلان کردیا۔ اپنے بیان میں ٹرمپ نے کہا کہ ڈیموکریٹس مختلف شخصیات کو مواخذے اور سزاؤں کی دھمکیاں دے رہے ہیں، حتیٰ کہ اٹارنی جنرل سمیت دیگر حکام کو بھی اس نوعیت کی کارروائیوں کا نشانہ بنانے کی باتیں کی جارہی ہیں۔ امریکی صدر نے ڈیموکریٹس کے اس طرزِ عمل کو اعلیٰ سطح کی بھتہ خوری سے تشبیہ دیتے ہوئے کہا کہ سیاسی وابستگی کی بنیاد پر ری پبلکن رہنماؤں اور ان کے مالی معاونین کو نشانہ بنایا جا رہا ہے۔ ان کے بقول ری پبلکنز اور ان کے حامیوں کو جیل بھیجنے کی دھمکیاں بھی دی جارہی ہیں۔

ٹرمپ نے سینیٹر ایلیسا سلاٹکن کا ذکر کرتے ہوئے دعویٰ کیا کہ ان کی جانب سے ری پبلکن نظریات رکھنے والے نوجوانوں کو بھی نشانہ بنانے کی بات کی جارہی ہے۔ صدر ٹرمپ کا کہنا تھا کہ قانون کی خلاف ورزی کرتے ہوئے دوسروں کو دھمکانے والوں کو جوابدہ ہونا چاہیے۔ انہوں نے مزید الزام لگایا کہ ڈیموکریٹک رہنماؤں نے ایسے افراد کو بھی دھمکی آمیز خطوط ارسال کیے ہیں جن کا کسی غیر قانونی سرگرمی سے تعلق نہیں۔ ٹرمپ نے اعلان کیا کہ وہ محکمہ انصاف کو ان الزامات اور ڈیموکریٹس کے  مجرمانہ اقدامات کی فوری تحقیقات کا حکم دے رہے ہیں۔