اسرائیلی پارلیمنٹ (کنیسٹ) نے منگل کے روز گادی آئزن کوٹ (Gadi Eisenkot) کی جماعت یاشار (Yashar
Party) سے تعلق رکھنے والے متان کہانا (Matan Kahana) کو 26 واں اسپیکر منتخب کیا۔ انہوں نے نیتن یاہو کی لیکوڈ
پارٹی کے عامر اوہانا کی
(Amir Ohana) جگہ لی ہے۔
کنیسٹ کے ترجمان کے مطابق متان کہانا کہانا (Matan Kahana) کو 66ارکان کی حمایت حاصل ہوئی، جبکہ لیکوڈ کے امیدوار اور حکومتی اتحاد
کے چیف وہپ اوفیر کاتز (Ofir Katz) کو الگ ووٹنگ میں 52 ارکان نے حمایت دی۔ دونوں امیدواروں کے درمیان براہِ
راست مقابلے کے بجائے الگ الگ ووٹنگ کرائی گئی۔ یہ انتخاب آئزن کوٹ کی قیادت میں اپوزیشن
اتحاد کی پارلیمنٹ میں اہم پیش رفت ہے۔ 27 اکتوبر
کے انتخابات کے بعد نیتن یاہو اور ان کے دائیں بازو اور انتہائی قدامت پسند مذہبی
جماعتوں پر مشتمل اتحاد ۱۲۰؍ رکنی پارلیمنٹ میں صرف 53 نشستوں
تک محدود رہ گیا، جبکہ اپوزیشن کو 67 نشستیں
حاصل ہوئیں۔ اپوزیشن کی نشستوں میں چار یہودی جماعتوں کی 48
اور دو عرب جماعتوں، جوائنٹ لسٹ اور رعم، کی مجموعی 19نشستیں شامل ہیں۔
صدر اسحاق ہرزوگ (Isaac Herzog) نے رواں ماہ آئزن کوٹ (Gadi Eisenkot) کو نئی حکومت تشکیل دینے کی ذمہ داری سونپی تھی۔
انہیں نیتن یاہو کی جگہ حکومت بنانے کے لیے ساڑھے چار ہفتے مزید مل سکتے ہیں، تاہم
اس راستے میں سیاسی اختلافات اور اتحاد سازی کی پیچیدگیاں موجود ہیں۔ فی الحال
اپوزیشن پارلیمنٹ کے اہم عہدوں، کمیٹیوں اور قانون سازی کے ایجنڈے پر زیادہ اختیار
حاصل کرکے نیتن یاہو کی عبوری حکومت کی نگرانی اور اس کے فیصلوں کو محدود کرنے کی
کوشش کر رہی ہے۔ آئزن کوٹ نے متان کہانا (Matan
Kahana) کے انتخاب کو ’’جمہوری لحاظ سے درست اقدام‘‘ قرار دیتے ہوئے
کہا کہ یہ تبدیلی ان ارکان کی واضح اکثریت کی عکاسی کرتی ہے جنہوں نے تبدیلی کے حق
میں ووٹ دیا۔
اپوزیشن نے مالیات اور دفاع سمیت اہم پارلیمانی کمیٹیوں کے
عبوری سربراہ بھی مقرر کیے ہیں۔ اپوزیشن جماعت اسرائیل بیتینو کے رہنما اویگدور
لیبرمین (Avigdor Lieberman) ، جو خارجہ امور اور دفاعی کمیٹی کی سربراہی
کر رہے ہیں، تمام سکیورٹی سربراہان کو بریفنگ کے لیے طلب کرنے کا اعلان کر چکے
ہیں۔ اپوزیشن کی اہم ترجیحات میں نیتن یاہو کی سابقہ حکومت کے عدالتی اصلاحات کے
منصوبوں کو واپس لینا بھی شامل ہے۔ ان اصلاحات کے خلاف 2023 میں اسرائیل میں بڑے
پیمانے پر احتجاج ہوا تھا۔ ناقدین کا کہنا تھا کہ ان اقدامات سے جمہوری ادارے
کمزور اور حکومت پر عدالتی نگرانی محدود ہوجائے گی۔ اپوزیشن نے ججوں کے انتخاب کے
طریقہ کار میں تبدیلی اور اٹارنی جنرل کے اختیارات محدود کرنے والے قوانین کو واپس
لینے کے لیے کمیٹیاں قائم کی ہیں۔ میڈیا قوانین میں تبدیلیوں کو واپس لینے اور 7اکتوبر 2023 کے حملے سے متعلق ناکامیوں کی تحقیقات کے
لیے ریاستی تحقیقاتی کمیشن قائم کرنے کا منصوبہ بھی اس کے ایجنڈے میں شامل ہے۔
نیتن یاہو کے حامیوں نے متان کہانا کے انتخاب کی مخالفت کی اور
عرب جماعتوں کی حمایت پر اعتراض کیا۔ لیکوڈ پارٹی نے انتخاب کے بعد اسے کنیسٹ کی
تاریخ کا ایک افسوسناک مرحلہ قرار دیتے ہوئے عرب جماعتوں کو ’’دہشت گردوں کے
حامی‘‘ قرار دیا۔ تاہم نیتن یاہو کو ہٹانے کے لیے نئی حکومت تشکیل دینا آسان
نہیں۔ آئزن کوٹ چار یہودی اپوزیشن جماعتوں کی 48 نشستوں
پر مشتمل حکومت بنانے کے خواہاں ہیں، جسے عرب جماعتیں باہر رہ کر حمایت فراہم کریں۔
دوسری جانب لیبرمین عرب جماعتوں کی حمایت پر انحصار کرنے والی حکومت کے مخالف ہیں
اور شاس اور یونائیٹڈ تورہ یہودیت (United
Torah Judaism) جیسی مذہبی جماعتوں سے مذاکرات کے حامی ہیں۔ سابق وزیر اعظم
نفتالی بینیٹ بھی نیتن یاہو کی لیکوڈ پارٹی کے ساتھ اتحاد کے امکانات پر غور کر
رہے ہیں، تاہم نیتن یاہو نے وزیر اعظم کا عہدہ برقرار رکھنے کی شرط رکھی ہے، جسے
آئزن کوٹ مسترد کر چکے ہیں۔ اس صورت حال نے نئی حکومت کی تشکیل کے امکانات کو
مزید پیچیدہ بنا دیا ہے۔