نئے جرمن صدر کے لیے نمایاں خاتون امیدوار اِلزے آئگنر کون؟

جنوبی صوبے باویریا  (Bavaria) سے تعلق رکھنے والی سیاست دان اِلزے آئگنر  (Ilse Aigner) کو موجودہ صدر فرانک والٹر اشٹائن مائر (Frank-Walter Steinmeier)  کا جانشین منتخب کیے جانے کا امکان بڑھ گیا ہے۔ اگرچہ وفاقی جمہوریہ جرمنی میں عہدہ صدارت بڑی حد تک علامتی نوعیت کا ہے، لیکن صدر کو ملک کا سربراہ اور قوم کے لیے ایک اخلاقی رہنما بھی سمجھا جاتا ہے۔ اطلاعات کے مطابق جرمن چانسلر اور کرسچن ڈیموکریٹک یونین (سی ڈی یو) کے سربراہ فریڈرش میرس  (Friedrich Merz) بھی آئگنر  (Ilse Aigner) کی حمایت میں ہیں۔ آئگنر  (Aigner)  سی ڈی یو کی حلیف جماعت یونین جماعت سی ایس یو کی سربراہ اور صوبے باویریا  (Bavaria) کی پارلیمان کی اسپیکر ہیں۔ 30 جنوری 2027 کو خصوصی طور پر بلایا جانے والا وفاقی کنونشن جرمنی کے اگلے صدر کا انتخاب کرے گا۔ چونکہ سی ڈی یو، سی ایس یو اور ان کی حکومتی اتحادی سوشل ڈیموکریٹک پارٹی کو اکثریت حاصل ہے، اس لیے آئگنر کی کامیابی کے امکانات بہت روشن سمجھے جا رہے ہیں۔

الیکٹریشن: جنہیں تعلقات استوار کرنے کا ہنر خوب آتا ہے

آئگنر کئی حوالوں سے ایک غیر روایتی سیاست دان ہیں، خاص طور پر جرمنی میں جہاں سیاست میں آنے والوں کے لیے قانون کی ڈگری اکثر اہم سمجھی جاتی ہے۔ 61 سالہ آئگنر  (Aigner) کے پاس کوئی یونیورسٹی ڈگری نہیں۔ انہوں نے ٹیلی کمیونیکیشن ٹیکنیشن کی تربیت حاصل کی اور اپنے والدین کے برقی آلات کے کاروبار سے وابستہ رہی ہیں۔ بعد ازاں انہوں نے فوجی ہیلی کاپٹر بنانے والی کمپنی یوروکاپٹر  (Eurocopter) میں بھی کئی سال کام کیا، جو اب ایئربس گروپ کا حصہ ہے۔ وہاں وہ برقی پرزوں کی تیاری اور ترقی کے شعبے سے منسلک تھیں۔ انہوں نے 1994 میں سی ایس یو کی ٹکٹ پر باویریا  (Bavaria) کی پارلیمان میں قدم رکھا۔ 1998 سے 2013 تک وہ وفاقی جرمن پارلیمان (بنڈس ٹاگ) (Bundestag)  کی رکن رہیں۔ 2008 سے 2013 تک انہوں نے اس وقت کی چانسلر انجیلا مرکل کی کابینہ میں زراعت اور صارفین کے حقوق کے تحفظ کی وفاقی وزیر کے طور پر بھی خدمات انجام دیں۔ یہ دونوں وزارتیں خاصی حساس سمجھی جاتی ہیں، تاہم آئگنر  (Aigner) نے کسی بڑے بحران کے بغیر اپنی ذمہ داریاں نبھائیں اور عمومی طور پر انہیں اچھی منتظم تصور کیا گیا۔ اس سال اکتوبر میں میونخ میں سی ایس یو کے ایک اجلاس کے دوران جب میرس (Merz)  نے اپنے افتتاحی خطاب میں آئگنر  (Aigner) کا نام لیا تو مندوبین نے کھڑے ہو کر زور دار تالیاں بجائیں اور اس تجربہ کار خاتون سیاست دان کا بھرپور خیرمقدم کیا۔

پہلی خاتون اور پہلی غیر شادی شدہ صدر؟

آئگنر  (Aigner) نہ صرف جرمنی کی پہلی خاتون صدر بن سکتی ہیں بلکہ وہ اس منصب تک پہنچنے والی پہلی ایسی شخصیت بھی ہوں گی جو کبھی شادی کے بندھن میں نہیں بندھیں۔ اگرچہ 1999 کے بعد تقریباً ہر صدارتی انتخاب میں خواتین امیدوار سامنے آتی رہی ہیں، لیکن وہ عموماً ایسی جماعتوں کی امیدوار تھیں، جن کے پاس کامیابی کے لیے مطلوبہ اکثریت نہیں تھی۔ اسی لیے برسوں سے مطالبہ کیا جا رہا تھا کہ بڑی جماعتیں کسی خاتون کو مشترکہ اور سنجیدہ امیدوار کے طور پر سامنے لائیں۔ قدامت پسند حلقوں میں آئگنر  (Aigner) طویل عرصے سے احترام کی نگاہ سے دیکھی جاتی ہیں۔

بے باک مگر محتاط مزاج

جنوری میں باویریا  (Bavaria) کے اخبار ‘میرکؤر‘  (Merkur) نے ایک اسکول کے دورے کے دوران طلبہ سے آئگنر  (Aigner) کی گفتگو کا احوال شائع کیا۔ چوتھی جماعت کے طلبہ کے سوالات کے جواب میں انہوں نے کہا کہ انہوں نے اپنی سیاسی زندگی پہلے سے منصوبہ بندی کے تحت نہیں بنائی، لیکن وہ کبھی ''خاموش رہنے‘‘ والوں میں شامل نہیں رہیں، اور یہی خصوصیت ان کے مختلف عہدوں تک پہنچنے کی ایک وجہ بھی بنی۔

تاہم انہوں نے یہ بھی ثابت کیا کہ جب خاموشی زیادہ مناسب ہو تو وہ خاموش رہنا بھی جانتی ہیں۔ یونین جماعتوں کے اندر صدارتی امیدوار کے انتخاب کے دوران انہوں نے عوامی سطح پر کوئی بھی تبصرہ کرنے سے گریز کیا۔ کئی مبصرین کے نزدیک آئگنر  (Aigner) کو نامزد کر کے میرس اس بات کی راہ بھی ہموار کر رہے ہیں کہ اگر اگلے وفاقی انتخابات میں سی ڈی یو/سی ایس یو اتحاد کامیاب ہوتا ہے تو چانسلر کا عہدہ سی ڈی یو کی کسی شخصیت کے پاس جائے۔ تاہم حتمی فیصلہ 30 جنوری کو ہو گا، جبکہ نئے وفاقی جرمن صدر کو مارچ کے وسط میں باضابطہ طور پر اپنا منصب سنبھالنا ہو گا۔