برطانیہ کا سعودی عرب کے دفاع کے لیے لڑاکا طیارے تعینات کرنے کا اعلان

برطانیہ نے یمن کے حوثیوں کے حملوں سے سعودی عرب کے دفاع کے لیے لڑاکا طیارے تعینات کرنے کا اعلان کردیا۔برطانوی وزارتِ دفاع کے مطابق رائل ایئر فورس کے ٹائفون لڑاکا طیارے سعودی عرب کے شہروں اور اہم تنصیبات کے تحفظ کے لیے دفاعی فضائی مشن انجام دیں گے۔ برطانوی وزارتِ دفاع کی جانب سے جاری کردہ ایک بیان میں کہا گیا ہے کہ یہ تعیناتی سعودی عرب کے لیے اضافی دفاعی فوجی تعاون کا حصہ ہے۔ وزارت کے مطابق برطانیہ سعودی شہروں اور اہم قومی بنیادی ڈھانچے کو فضائی حملوں سے بچانے کے لیے رائل ائیر فورس کے ٹائفون لڑاکا طیاروں کی مدد سے دفاعی کائونٹر ایئر مشنز اڑائے گا۔حکام کے مطابق گزشتہ ایک ماہ کے دوران حوثیوں نے سعودی عرب پر حملوں میں تیزی لائی ہے۔ ان حملوں میں تیل کی تنصیبات اور ہوائی اڈوں سمیت اہم مقامات کو بیلسٹک میزائلوں اور ڈرونز سے نشانہ بنایا گیا۔

بیان میں واضح کیا گیا ہے کہ یہ طیارے مکمل طور پر دفاعی کردار ادا کریں گے اور حوثیوں کے خلاف کوئی جارحانہ کارروائی نہیں کریں گے۔ اس کے علاوہ برطانیہ سعودی عرب کے اندر دفاعی سازوسامان کی نقل و حرکت میں مدد کے لیے ایک ملٹری ٹرانسپورٹ طیارہ اور سعودی افسران کی معاونت کے لیے برطانوی فوجی مشیر بھی تعینات کرے گا۔ برطانوی وزیرِ دفاع ویس اسٹریٹنگ نے اپنے بیان میں کہا کہ ہمارے اتحادی سعودی عرب پر حوثیوں کے مسلسل حملے انتہائی قابلِ مذمت ہیں۔ خاص طور پر ریاض ائیرپورٹ کو نشانہ بنانا اس بات کو ظاہر کرتا ہے کہ حوثی خطے میں کشیدگی بڑھانے کے لیے کس حد تک جارہے ہیں۔

برطانوی وزیراعظم کے دفتر کے ترجمان کے مطابق برطانیہ پہلے ہی سعودی عرب کو فضائی ایندھن کی فراہمی میں معاونت فراہم کر رہا ہے، جبکہ مملکت کے دفاع کے لیے فضائی دفاعی سازوسامان اور برطانوی اہلکار بھی تعینات کیے جا چکے ہیں۔ ترجمان نے واضح کیا کہ برطانوی ٹائفون طیارے سعودی عرب کی جانب آنے والے میزائلوں اور ڈرونز کو روکنے کے لیے کارروائی کریں گے ۔ برطانیہ سعودی عرب کو اٹلس اے 400 ایم ٹرانسپورٹ طیارہ بھی فراہم کرے گا۔