Politics
امریکا میں 3 نومبر 2026 کو وسط مدتی انتخابات ہوں گے، جن میں ایوانِ نمائندگان، سینیٹ اور 36 ریاستوں کے گورنروں کا انتخاب کیا جائے گا۔
امریکا میں 3 نومبر 2026 کو وسط مدتی انتخابات ہوں گے، جن میں ایوانِ نمائندگان، سینیٹ اور 36 ریاستوں کے گورنروں کا انتخاب کیا جائے گا۔ ان انتخابات میں صدر ڈونلڈ ٹرمپ کی جماعت ری پبلکن پارٹی کو کانگریس میں اپنی اکثریت برقرار رکھنے کا چیلنج درپیش ہے، جبکہ ڈیموکریٹس دونوں ایوانوں میں اکثریت حاصل کرنے کی کوشش کر رہے ہیں۔ انتخابات کے لیے قبل از وقت ووٹنگ کئی ہفتوں سے جاری ہے۔
ان انتخابات کی اہمیت کا اندازہ اس بات سے لگایا جا سکتا ہے کہ 12 اکتوبر تک سیاسی تشہیری مہمات پر ریکارڈ 3.8 ارب ڈالر خرچ کیے جا چکے تھے۔ انتخابی اخراجات پر نظر رکھنے والے ادارے ایڈ امپیکٹ کے مطابق ٹیکنالوجی کمپنیوں کے ارب پتی مالک ایلون مسک نے بھی ری پبلکن امیدواروں کی حمایت میں تقریباً 36 کروڑ 60 لاکھ ڈالر خرچ کیے ہیں۔ اگر ووٹنگ کا تناسب 2022 کے وسط مدتی انتخابات جیسا رہا تو اس سال 10 کروڑ سے زیادہ امریکی شہری اپنا حقِ رائے دہی استعمال کر سکتے ہیں، تاہم یہ تعداد 2024 کے صدارتی انتخابات میں ڈالے گئے 15 کروڑ 50 لاکھ سے زائد ووٹوں سے کم ہوگی۔
اس وقت ری پبلکن پارٹی کو ایوانِ نمائندگان میں 218 کے مقابلے میں 214 نشستوں کی برتری حاصل ہے، جبکہ 2 نشستیں خالی ہیں اور ایک آزاد رکن ری پبلکنز کے ساتھ شامل ہے۔ ایوان کا کنٹرول حاصل کرنے کے لیے ڈیموکریٹس کو خالصتاً 4 نشستیں مزید جیتنا ہوں گی۔ سینیٹ میں ری پبلکنز کو 53 کے مقابلے میں 47 نشستوں کی اکثریت حاصل ہے اور یہاں بھی ڈیموکریٹس کو 4 اضافی نشستیں درکار ہیں۔
ریاستوں مین، اوہائیو، شمالی کیرولائنا، آئیووا اور جارجیا سمیت تقریباً 10 اہم انتخابی مقابلے سینیٹ میں اکثریت کا فیصلہ کر سکتے ہیں۔ اگر ڈیموکریٹس ایوانِ نمائندگان میں کامیاب ہوئے تو نیویارک کے رکن کانگریس حکیم جیفریز اسپیکر بن سکتے ہیں۔ اس صورت میں وہ اس عہدے پر فائز ہونے والے پہلے سیاہ فام امریکی ہوں گے اور ٹرمپ انتظامیہ کے خلاف تحقیقات شروع کرانے میں اہم کردار ادا کر سکیں گے۔
رائٹرز اور ایپسوس کے ستمبر میں کیے گئے ایک سروے کے مطابق صدر ٹرمپ کی کارکردگی کی منظوری کی شرح 32 فیصد تک گر گئی تھی۔ مہنگائی، اشیائے ضروریہ کی بڑھتی قیمتیں اور امیگریشن سے متعلق حکومتی اقدامات انتخابی نتائج پر اثرانداز ہو سکتے ہیں۔ بعض تجزیوں کے مطابق لاطینی امریکی نژاد ووٹرز، جنہوں نے 2024 میں ٹرمپ کی حمایت کی تھی، معاشی مشکلات اور امیگریشن پالیسیوں پر تحفظات کے باعث دوبارہ ڈیموکریٹس کی طرف مائل ہو سکتے ہیں۔ تاہم ڈیموکریٹس کی واضح برتری یقینی نہیں، کیونکہ ری پبلکنز کو انتخابی مہم پر زیادہ اخراجات، ڈیموکریٹس کے بارے میں بعض ووٹرز کے تحفظات اور بائیں بازو کے امیدواروں کی نامزدگی سے پیدا ہونے والی سیاسی بحث سے فائدہ پہنچ سکتا ہے۔
امریکی تاریخ میں وسط مدتی انتخابات صدر کی جماعت کے لیے سیاسی مشکلات پیدا کرتے رہے ہیں۔ 2010 میں صدر براک اوباما کے دور میں ری پبلکنز نے ایوانِ نمائندگان کی 63 اضافی نشستیں جیت کر ڈیموکریٹس سے اکثریت چھین لی تھی، جبکہ 2018 میں ٹرمپ کی پہلی صدارتی مدت کے دوران ڈیموکریٹس نے ایوانِ نمائندگان میں 40 نشستوں کا خالص اضافہ کیا تھا۔ اس بار ریاستی قانون ساز اداروں کی نشستوں پر بھی تقریباً تمام ریاستوں میں ووٹنگ ہوگی۔ انتخابات کے انتظام کی ذمہ داری ریاستی حکام کے پاس ہے، تاہم ٹرمپ کی جانب سے انتخابی دھاندلی کے بار بار دعووں کے باعث ممکنہ قانونی تنازعات اور وفاقی مداخلت کے خدشات بھی زیرِ بحث ہیں۔
امریکی ریاست جنوبی کیرولائنا کے شہر کلمسن میں مڈٹرم انتخابات کی مہم کے سلسلے میں منعقدہ جلسے کے دوران بدنظمی اور ہاتھا پائی کے باعث امریکی صدر ڈونلڈ ٹرمپ کو اپنا خطاب کچھ دیر کے لیے روکنا پڑا۔ تفصیلات کے مطابق ڈونلڈ ٹرمپ کلمسن یونیورسٹی کے ‘ٹی ایڈ گیریسن ایرینا’ میں ریپبلکن امیدواروں کی حمایت میں ریلی سے خطاب کر رہے تھے کہ اس دوران ہال میں موجود کئی مظاہرین نے ان کے خلاف نعرے بازی شروع کر دی۔ خطاب کے دوران اس وقت کشیدگی بڑھ گئی جب ہال میں موجود ٹرمپ کے ایک حامی اور سیکیورٹی اہلکاروں کی جانب سے ہٹائے جانے والے مظاہرین کے درمیان تلخ کلامی ہوئی اور ایک حامی نے مظاہرین میں سے ایک شخص کو مکا دے مارا۔ اس بدمزگی کے بعد سیکیورٹی اہلکار فوری طور پر تحرک میں آئے اور حملہ آور کو قابو کرنے کے ساتھ ساتھ مظاہرین کو جلسہ گاہ سے باہر نکال دیا۔ واقعے کے وقت ڈونلڈ ٹرمپ نے اسٹیج سے منظر کا جائزہ لیتے ہوئے اپنا خطاب روک دیا۔ ٹرمپ نے اسٹیج سے گھونسا مارنے والے اپنے حامی کی تعریف کرتے ہوئے طنزاً کہا ’یہ زبردست تھا، مجھے یہ پسند آیا۔‘ انہوں نے شرکاء کی خیریت دریافت کی اور پولیس کو ہدایت کی کہ مظاہرین کو باہر منتقل کیا جائے۔
واضح رہے کہ نومبر میں ہونے والے مڈ ٹرم انتخابات کے پیش نظر امریکی سیاست میں زبردست جوش و خروش اور سیاسی کشیدگی دیکھی جا رہی ہے۔ اس سے قبل بھی ٹرمپ کی کئی انتخابی ریلیوں میں مخالفین اور حامیوں کے درمیان اسی نوعیت کے تصادم اور شدید نعرے بازی کے واقعات پیش آ چکے ہیں۔
