ہیٹی لاقانونیت: تین ماہ میں ایک ہزار سے زیادہ افراد ہلاک، یو این

ہیٹی (Haiti)  میں انسانی حقوق کی سنگین پامالیوں کے واقعات متواتر جاری ہیں جہاں رواں سال جولائی سے ستمبر تک جرائم پیشہ مسلح گروہوں کی جانب سے اور ان کے خلاف کارروائیوں میں ایک ہزار سے زیادہ لوگ ہلاک ہوئے۔ ملک میں اقوام متحدہ کے دفتر کے سربراہ کارلوس روئز میسیو  (Carlos Ruiz Massieu) نے بتایا ہے کہ قتل و غارت کے واقعات اس بات کی یاد دہانی ہیں کہ شہریوں کے تحفظ کا نظام مضبوط بنانے اور مسلح گروہوں سے واگزار کرائے گئے علاقوں میں ریاستی عملداری قائم کرنے کی اشد ضرورت ہے۔ اقوام متحدہ کی سلامتی کونسل نے ہیٹی میں مسلح گروہوں کے خلاف کارروائی کے لیے خصوصی فورس تعینات کرنے کی منظوری دے رکھی ہے، تاہم یہ فورس تاحال مکمل طور پر تعینات نہیں ہو سکی۔ اقوام متحدہ کے دفتر کی رپورٹ کے مطابق، ستمبر تک تین ماہ کے عرصہ میں کم از کم 1,167 افراد ہلاک اور 459 زخمی ہوئے۔ ایسے 45 فیصد سے زیادہ واقعات کی ذمہ داری مسلح گروہوں پر عائد ہوتی ہے جبکہ پانچ فیصد واقعات میں گینگ ارکان اور ان کے مبینہ سہولت کاروں کو نشانہ بنانے والے گروہ ملوث تھے۔ ہلاکتوں اور لوگوں کے زخمی ہونے کے نصف سے زیادہ واقعات سکیورٹی فورسز کی جانب سے مسلح گروہوں کے خلاف زمینی اور فضائی کارروائیوں کے دوران پیش آئے۔ ان کارروائیوں کو بعض اوقات ڈرون استعمال کرنے والی ایک نجی کمپنی کی معاونت بھی حاصل رہی۔

بچوں کا قتل اور چرچ میں ہلاکتیں

رپورٹ میں مسلح گروہوں کی جانب سے مختلف علاقوں پر قبضے کے لیے ہونے والے لڑائیوں میں بڑے پیمانے پر قتل و غارت کے بارے میں بھی بتایا گیا ہے۔ اگست کے آغاز میں مسلح گروہوں نے سیٹے سولیل  (Cité Soleil) میں کم از کم 19 افراد کے سر قلم کر دیے جن میں 12 معمر خواتین بھی شامل تھیں۔ جولائی اور اگست میں کینسکوف  (Kenscoff) قصبے میں ہونے والے دو حملوں میں کم از کم 105 افراد ہلاک ہوئے جن میں 19 بچے بھی شامل تھے۔ ان حملوں کے دوران 36 سے زیادہ افراد کو ایک چرچ کے صحن میں گولیاں مار کر قتل کیا گیا۔

رپورٹ کے مطابق، ہلاک ہونے والے مجموعی افراد میں 16 فیصد سے زیادہ کا کسی بھی مسلح گروہ سے نہیں تھا۔ اس کے علاوہ، دھماکہ خیز مواد سے لیس ڈرونز کے ذریعے کیے گئے حملوں میں بھی کم از کم چار افراد ہلاک ہوئے جن میں دو بچے شامل تھے۔ رپورٹ میں ہیٹی کی قومی پولیس کے اہلکاروں کے ہاتھوں ماورائے عدالت قتل اور اقدام قتل کے 44 واقعات بھی درج ہیں جبکہ گزشتہ سہ ماہی میں ایسے واقعات کی تعداد 14 تھی۔

اغوا، جنسی تشدد اور جبری بھرتی

رپورٹ کے مطابق، اس عرصہ کے دوران کم از کم 137 افراد کو تاوان کے لیے اغوا کیا گیا جبکہ اپریل سے جون کے دوران یہ تعداد 81 تھی۔ اغوا ہونے والوں میں 10 فیصد بچے تھے۔ اقوام متحدہ دفتر نے مسلح گروہوں کے ارکان کی جانب سے جنسی تشدد کے 344 متاثرین کی نشاندہی بھی کی ہے۔ متاثرین کی عمریں آٹھ سے 75 سال کے درمیان تھیں، جبکہ 77 فیصد واقعات اجتماعی زیادتی کے تھے۔ مسلح گروہوں کی جانب سے بچوں کو مجرمانہ مقاصد کے لیے بھرتی کرنے اور ان سے مختلف کام لینے کا سلسلہ بھی جاری رہا۔ اگست میں گریسیئر کے علاقے  (Gréssier area) میں سکیورٹی فورسز کے ساتھ جھڑپوں کے دوران کم از کم 32 لڑکے مارے گئے جن کی عمریں 14 سے 16 سال کے درمیان تھیں اور انہیں ایک مسلح گروہ میں جبراً بھرتی کیا گیا تھا۔ اقوام متحدہ نے عالمی برادری پر زور دیا ہے کہ وہ ہیٹی کی مدد کے لیے اپنا عزم برقرار رکھے اور مسلح گروہوں کے خلاف کارروائی کے لیے خصوصی فورس کی مکمل تعیناتی کو یقینی بنائے۔