اقوام متحدہ کے ادارہ اطفال (یونیسف) نے یمن میں متحارب فریقین سے اپیل کی ہے کہ وہ بچوں کے
تحفظ کو یقینی بنائیں جہاں ستمبر سے جاری جھڑپوں کے نتیجے میں 64 بچے ہلاک اور بیسیوں زخمی ہو چکے ہیں۔ یونیسف نے خبردار کیا ہے کہ اگر لڑائی کا سلسلہ جاری رہا تو بچوں کی
ہلاکتوں اور ان کے زخمی ہونے کے واقعات میں مزید اضافہ ہو سکتا ہے جبکہ تعز اور
لحج کے گنجان آباد علاقوں میں صورت حال کہیں زیادہ تشویش ناک ہے۔ ادارے کی ایگزیکٹو ڈائریکٹر کیتھرین رسل (Catherine Russell) نے کہا ہے کہ یمن میں ہلاک اور
زخمی ہونے والے بچوں کی تعداد افسوسناک طور سے بڑھ رہی ہے۔ یہ سلسلہ اب بند ہونا
چاہیے۔ ادارے نے بتایا ہے کہ حالیہ لڑائی نے بچوں کی
ضروریات سے وابستہ بنیادی سہولیات اور تنصیبات کو بھی براہ راست متاثر کیا ہے۔ یونیسف کے تعاون سے چلنے والے
پانچ سکولوں سمیت کم از کم سات تعلیمی اداروں اور 28 طبی مراکز کو بھی لڑائی میں نقصان پہنچا ہے۔ 2 نومبر کو لحج میں یونیسف کے تعاون سے چلنے والے ایک طبی مرکز
پر حملے میں مبینہ طور پر پانچ افراد ہلاک ہوئے جن میں تین طبی کارکن بھی شامل
تھے۔
خوراک اور ایندھن کی قلت
لڑائی
سے متاثرہ علاقوں میں 3 لاکھ 30 ہزار سے زیادہ لوگ بے گھر ہو چکے ہیں جن میں ایک
لاکھ 74 ہزار بچے بھی شامل ہیں۔ ان میں سے بیشتر خاندان نامکمل یا تباہ شدہ عمارتوں میں پناہ
لینے پر مجبور ہیں اور انہیں خوراک، پینے کے صاف پانی اور طبی سہولیات تک رسائی میں مشکلات کا سامنا ہے۔ یونیسف نے بالخصوص تعز شہر کی صورتحال پر تشویش کا
اظہار کیا ہے جہاں 8 لاکھ سے زیادہ لوگ انسانی امداد سے محروم
ہیں کیونکہ شہر کو عدن سے ملانے والی مرکزی شاہراہ بند ہے۔ واضح رہے کہ عدن یمن کی بین الاقوامی طور پر تسلیم شدہ حکومت کا
مرکز ہے۔ متبادل راستے بھی غیر محفوظ ہیں۔ اطلاعات کے مطابق حوثی جنگجو عدن سے محض
60 کلومیٹر کے فاصلے تک پہنچ چکے ہیں۔ تعز
میں پانی کی پیداوار تقریباً نصف رہ گئی ہے جبکہ خوراک اور ایندھن کی قیمتیں دو
گنا سے بھی زیادہ بڑھ چکی ہیں۔ ادویات، ایندھن، طبی آکسیجن اور بجلی کی قلت کے باعث ہنگامی طبی امداد، زچگی اور
نومولود بچوں کی نگہداشت کا نظام بھی شدید خطرات سے دوچار ہے۔
5 لاکھ
طلبہ کی تعلیم متاثر
یونیسف
کے مطابق، لڑائی سے متاثرہ علاقوں میں ایک ہزار 160 سے زیادہ سکول بند ہو چکے ہیں
یا وہاں تعلیمی سرگرمیاں معطل ہیں جس کے نتیجے میں پانچ لاکھ سے زیادہ طلبہ کی
تعلیم متاثر ہوئی ہے۔ ادارے
کی متحرک ٹیموں کی جانب سے طبی معائنے کے دوران سامنے آیا ہے کہ ہر تین میں سے
تقریباً ایک بچہ شدید غذائی قلت کا شکار ہے۔ کیتھرین رسل کا کہنا ہے کہ یمن کے بچے پہلے ہی بہت زیادہ دکھ
اور مصائب برداشت کر چکے ہیں۔ انہیں فوری طور پر محفوظ اور بلا رکاوٹ فراہم کی
جانے والی انسانی امداد کی ضرورت ہے۔ بچوں کا تحفظ ہر صورت یقینی بنایا جانا
چاہیے۔ اس میں صحت کی سہولیات، تعلیم، پینے کے صاف پانی اور خوراک تک ان کی رسائی
بھی شامل ہے۔
امدادی سرگرمیوں میں توسیع
بحران
کی شدت کے پیش نظر یونیسف نے اپنی ہنگامی امدادی سرگرمیوں کو وسعت دینے کا فیصلہ
کیا ہے جس کے تحت تین لاکھ 50 ہزار افراد تک امداد پہنچانے کا ہدف مقرر کیا گیا
ہے۔ اس مقصد کے لیے عدن، لحج، ابین،
مآرب اور تعز میں بے گھر افراد کی عارضی بستیوں اور متاثرہ آبادیوں تک صحت اور
غذائیت کی فراہمی کے لیے متحرک ٹیمیں دوبارہ تعینات کی جا رہی ہیں۔ یونیسف ہنگامی بنیاد پر پانی اور نکاسی آب کی
سہولیات کی فراہمی بھی بڑھا رہا ہے۔ علاوہ ازیں، بچوں کو نفسیاتی مدد اور سماجی
تحفظ کی خدمات فراہم کی جا رہی ہیں جن میں ایسے بچوں کی دیکھ بھال اور تحفظ بھی
شامل ہے جو اپنے والدین یا سرپرستوں سے بچھڑ گئے ہیں۔