میانمار
میں انسانی حقوق کی صورتحال جاننے کے لیے اقوام متحدہ کی مقرر کردہ خصوصی نمائندہ کیلی ای
کری (Kelly
A. Creary) نے خبردار کیا ہے کہ ملک میں مسلح تنازع شدت اختیار کرنے، پناہ گزین
کیمپوں میں بڑھتے عدم تحفظ اور عطیہ دہندگان کی جانب سے مالی امداد میں کمی کے
باعث سنگین انسانی بحران مزید شدت اختیار کر رہا ہے۔ یہ
بحران میانمار کے مغربی علاقوں سے لے کر بنگلہ دیش کے جنوب مشرقی حصوں تک پھیلا ہوا ہے
جہاں میانمار سے تعلق رکھنے والے 10 لاکھ سے زیادہ روہنگیا اور دیگر قومیتوں سے
تعلق رکھنے والے افراد نے پناہ لے رکھی ہے۔ کیلی
کری (Kelly
A. Creary) نے یہ بات بنگلہ دیش کا اپنے پہلے دورے کی تکمیل کے بعد کہی ہے جو
عالمی عدالت انصاف (آئی سی جے) کے ایک
انتہائی اہم اور متوقع فیصلے سے ایک روز قبل ختم ہوا۔ عدالت
نے یہ فیصلہ کرنا ہے کہ آیا ریاست میانمار نے 2017 میں روہنگیا مسلمانوں کے خلاف
نسل کشی کا جرم کیا تھا یا نہیں۔ یہ مقدمہ افریقی ملک گیمبیا نے دائر کیا تھا۔
پناہ گزینوں
کے بڑھتے مسائل
کیلی کری (Kelly A. Creary) نے
کہا ہے کہ میانمار، بالخصوص ریاست راخائن میں لڑائی تیز ہو رہی ہے جبکہ امدادی
سرگرمیوں کے لیے عطیہ دہندگان کی مالی معاونت میں مسلسل کمی آ رہی ہے۔ بنگلہ دیش میں پناہ گزینوں کی امداد کا بجٹ اپنی تاریخ کی کم ترین سطح پر پہنچ چکا
ہے حالانکہ امداد کے مستحق افراد کی تعداد اب تک کی بلند ترین سطح پر ہے۔ خصوصی نمائندہ نے بنگلہ دیشی حکومت کے اس فیصلے کا
خیرمقدم کیا ہے جس کے تحت روہنگیا سمیت میانمار کے دیگر پناہ گزینوں کی اپنے وطن
واپسی کے لیے ایک جامع حکمت عملی تیار کرنے کی غرض سے خصوصی کمیٹی تشکیل دی گئی
ہے۔ ان کا کہنا ہے کہ بنگلہ دیش میں
پناہ گزین کیمپوں اور ان کے میزبان مقامی آبادیوں کو درپیش انسانی، معاشی اور سلامتی کے مسائل درحقیقت میانمار
کی ریاست رخائن میں جاری مسلح تنازع سے گہرا تعلق رکھتے ہیں۔ پناہ گزینوں اور
میزبان آبادیوں کی مجموعی فلاح و بہبود کے لیے کیمپوں میں امن و امان اور سلامتی کی صورتحال کو بہتر بنانا
نہایت ضروری ہے۔
انسانی
حقوق سے انکار
کیلی کری (Kelly A.
Creary) نے
اس امر کی بھی نشاندہی بھی کی ہے کہ پناہ گزین کیمپوں اور ان کے گردونواح میں عدم
تحفظ اور لاقانونیت سے معاشرے کے کمزور ترین طبقات بری طرح متاثر ہو رہے ہیں۔ انہوں نے پالیسی سازوں اور بین الاقوامی شراکت
داروں پر زور دیا ہے کہ وہ پناہ گزینوں اور ان کی میزبان آبادیوں کے مسائل حل کرنے
کے لیے مزید جامع حکمت عملی پر غور کریں۔ موجودہ
بحران کی بنیادی ذمہ داری میانمار کے موجودہ حکمرانوں پر عائد ہوتی ہے۔ اس بحران
کی جڑیں رخائن سمیت پورے میانمار میں روہنگیا اور دیگر برادریوں کی شناخت، سلامتی
اور انسانی حقوق کو مسلسل تسلیم نہ کرنے کی پالیسی میں پیوست ہیں۔ انہوں نے واضح کیا ہے کہ جب تک حقوق سے انکار کے اس
رویے کا خاتمہ نہیں کیا جاتا اس وقت تک مسئلے کا کوئی پائیدار حل ممکن نہیں۔ خصوصی نمائندہ مارچ 2027ء میں اقوام متحدہ کی
انسانی حقوق کونسل کے اجلاس میں بنگلہ دیش کے اپنے دورے سے متعلق اپنی رپورٹ پیش
کریں گی۔
غیر جانبدار
ماہرین و اطلاع کار
غیرجانبدار ماہرین یا خصوصی اطلاع کار اقوام متحدہ کی انسانی حقوق
کونسل کے خصوصی طریقہ کار کے تحت مقرر کیے جاتے ہیں جو اقوام
متحدہ کے عملے کا حصہ نہیں ہوتے اور اپنے کام کا معاوضہ بھی وصول نہیں کرتے۔