بیجنگ نے کہا ہے کہ امریکہ، روس اور چین کے رہنما جمعرات کو چین کے
جنوبی شہر شینزن (Shenzhen) میں ایشیا پیسیفک اکنامک کوآپریشن (اے پی ای سی)
کے سربراہی اجلاس کے موقع پر اپنی پہلی سہ فریقی سربراہی ملاقات میں ’عالمی امن‘
پر بات چیت کریں گے۔ چینی
وزارت خارجہ کی ترجمان ماؤ ننگ (Mao Ning) نے کہا کہ صدر
شی جن پنگ، امریکی صدر ڈونلڈ ٹرمپ اور روسی صدر ولادیمیر پوٹن کے درمیان
یہ ملاقات غیر معمولی اہمیت کی حامل ہو گی۔ اس میں ’عالمی امن کے تحفظ اور باہمی
تعلقات میں استحکام کے فروغ‘ کے لیے تفصیلی تبادلہ خیال کیا جائے گا۔ تینوں رہنماؤں کی مجوزہ ملاقات کا موازنہ 1945ء کی
یالٹا کانفرنس سے کیا جا رہا ہے۔ یالٹا
کانفرنس (جسے کریمیا کانفرنس بھی کہا جاتا ہے) دوسری عالمی جنگ کے دوران منعقد ہونے والا ایک اہم
اجلاس تھا، جو 4 فروری سے 11 فروری 1945ء تک کریمیا کے شہر یالٹا میں ہوا تھا۔ یالٹا کانفرنس میں امریکی صدر فرینکلن ڈی روزویلٹ (Franklin D. Roosevelt) ، برطانوی وزیر اعظم ونسٹن چرچل (Winston Churchill) اور
سوویت رہنما جوزف اسٹالن (Joseph Stalin) نے
دوسری عالمی جنگ کے بعد نئی علاقائی سرحدوں کی تقسیم کے حوالے سے فیصلے کیے تھے،
جن میں دیگر ممالک کے مفادات کو زیادہ اہمیت نہیں دی گئی تھی۔ ان رہنماؤں نے جرمنی اور برلن کو فوجی قبضے کے لیے چار حصوں
میں تقسیم کرنے پر اتفاق کیا تھا اور اقوام متحدہ کے قیام کے منصوبوں کو بھی حتمی شکل دی
گئی تھی۔
تینوں
رہنماؤں کی ملاقات اہم کیوں؟
امریکی صدر ڈونلڈ ٹرمپ اس سے قبل کہہ چکے ہیں کہ شی اور پوٹن کے ساتھ
ان کی یہ ملاقات ’دلچسپ‘ ہو گی۔ ایشیا
کے لیے روانگی سے قبل وائٹ ہاؤس میں صحافیوں سے گفتگو کرتے ہوئے صدر
ٹرمپ نے کہا، ’’ہم اپنے پسندیدہ موضوع یعنی یوکرین پر بات کریں گے۔ یوکرین خود کو کھو رہا ہے۔ روس ہر ماہ 25 ہزار فوجی ہلاک کروا رہا ہے، اس لیے ہم اس معاملے پر
بھی بات کریں گے۔‘‘ گزشتہ ماہ
امریکی اخبار ’وال اسٹریٹ جرنل‘ میں شائع ہونے والی ایک رپورٹ کے مطابق صدر پوٹن
چاہتے ہیں کہ اس ملاقات کے ذریعے یوکرین میں جنگ کے خاتمے کے لیے ایسا معاہدہ طے
پائے جو ماسکو کے مفادات کے مطابق ہو۔ یوکرین کے صدر وولودیمیر زیلنسکی نے بھی خدشہ ظاہر
کیا ہے کہ شینزن میں روس، چین اور امریکہ کے رہنماؤں کی سہ فریقی
ملاقات اکیسویں صدی میں یالٹا کانفرنس کی طرز پر ’اثر و رسوخ کے دائروں کی ازسرنو
تقسیم‘ کا سبب بن سکتی ہے۔ صدر
زیلنسکی کا کہنا تھا، ’’ہم ہرگز نہیں چاہتے کہ یہ ملاقات ’یالٹا 2، 3 یا 4‘ میں
تبدیل ہو جائے، جس کے نتیجے میں اثر و رسوخ کے دائروں کی ازسرنو تقسیم کی جائے۔‘‘
روس کا ردعمل
خبر رساں ادارے اے ایف پی کے مطابق روسی ایوان صدر کریملن نے پیر کی
شب ایک بیان میں اس ملاقات کا 1945ء کی یالٹا کانفرنس سے موازنہ مسترد کر دیا۔ کریملن نے کہا کہ صدر پوٹن کی رواں ہفتے چینی صدر
شی جن پنگ اور امریکی صدر ڈونلڈ ٹرمپ کے ساتھ ملاقات میں دیگر ممالک کے مستقبل کا
فیصلہ نہیں کیا جائے گا۔ روس
کے سرکاری میڈیا کے مطابق کریملن کے ترجمان نے مزید کہا، ’’یہ کہنا کہ کوئی اکٹھا
ہو کر ’دنیا کے مستقبل کا فیصلہ‘ کرنے جا رہا ہے، یقیناً نہ تو روس کا مقصد ہے اور
نہ ہی چین کا۔ ‘انہوں
نے کہا، ’’ہم نہیں چاہتے کہ کوئی ہمارے مستقبل کا فیصلہ کرے اور ہم کبھی دوسروں کے
اپنے اپنے مستقبل کا فیصلہ کرنے کے حق میں مداخلت بھی نہیں کریں گے۔‘‘
دریں اثنا جرمن چانسلر فریڈرش میرس (Friedrich Merz), نے
صدر ٹرمپ پر زور دیا کہ وہ صدر پوٹن کے ساتھ مذاکرات کے دوران یوکرین کے معاملے پر
کوئی ’غیر متوقع فیصلہ‘ نہ کریں۔ انہوں نے کہا، ’’براہِ کرم کوئی اچانک فیصلہ نہ
کیجیے۔ ’ٹیم یورپ‘ اور ’ٹیم یوکرین‘ کے ساتھ مل کر اپنا کردار ادا کرتے رہیے۔‘‘