ایرانی
حکومت نے گزشتہ ہفتے کہا تھا کہ ملک میں پہلے بھی گیس کی قلت پیدا ہوتی رہی ہے، تاہم جنگ کے دوران گیس پروسیسنگ پلانٹس کو
پہنچنے والے نقصان کے باعث رواں موسم سرما میں یہ بحران زیادہ سنگین ہو گا
اور ملک کے بیشتر علاقے اس سے متاثر ہوں گے۔ جنگ
کے اثرات کے باعث ایران میں مہنگائی پہلے ہی بے قابو ہو چکی ہے اور لاکھوں
افراد روزگار سے محروم ہو گئے ہیں۔
ایسے حالات میں ایرانی عوام کی
مشکلات میں مسلسل اضافہ ہو رہا ہے۔
حکومتی
حلقوں کی اعلیٰ شخصیات کو خدشہ ہے کہ اس صورت حال سے معاشرے میں موجود تقسیم مزید
گہری ہو سکتی ہے، خصوصاً گزشتہ موسم سرما میں بڑے پیمانے پر ہونے والے احتجاج کو سختی سے کچلے جانے کے بعد پیدا ہونے
والی کشیدگی ابھی تک برقرار ہے۔ سڑک پر اشیا فروخت کرنے والے سید احمد سیدی
نے کہا، ''حقیقت یہ ہے کہ اگر ہماری گیس بند ہو گئی، تو ہمیں اپنا کام چھوڑ کر گھر
جانا پڑے گا۔ ایران میں بحیرہ کیسپیئن کے
قریب چاول کی ایک فیکٹری میں کام کرنے والی 65 سالہ مینا لہراسابی نے کہا، ''اس
جنگ کا خاتمہ ہونا چاہیے تاکہ ہم معمول کی زندگی کی طرف واپس جا سکیں اور تمام
مسائل اور مہنگائی ختم ہو۔ ان حالات میں زندگی جاری رکھنا مشکل ہے۔‘‘
’راکھ
کے نیچے سلگتی ہوئی آگ‘
ایک
سینئر ایرانی عہدیدار اور ایرانی سکیورٹی حکام میں سے ایک نے خبر رساں ادارے
روئٹرز کو بتایا کہ ملک کی اعلیٰ قیادت صورت حال پر بڑھتی ہوئی تشویش میں مبتلا
ہے۔ ان کے مطابق
اندرون ملک ایندھن کی قلت نے عوامی بے چینی اور ممکنہ احتجاج کے خدشات میں مزید
اضافہ کر دیا ہے۔ سکیورٹی
عہدیدار کے مطابق 28 فروری کو امریکہ اور اسرائیل کے حملوں کے آغاز کے بعد
سے حکمران نظام کے خلاف کوئی قابل ذکر احتجاج نہیں ہوا۔ تاہم ملکی انٹیلیجنس ادارے
ہائی الرٹ پر ہیں۔ عہدیدار
نے مزید بتایا کہ انٹیلیجنس ادارے حزب اختلاف کی کسی بھی سرگرمی پر گہری نظر رکھے
ہوئے ہیں اور انہیں خدشہ ہے کہ امریکہ سڑکوں پر مظاہرے بھڑکانے کی کوشش کر سکتا
ہے۔ اس سینئر ایرانی عہدیدار نے
خبردار کیا کہ ایرانی عوام کے لیے زندگی گزارنے کے حالات مسلسل مشکل تر ہوتے جا
رہے ہیں اور اب ان مشکلات کو برداشت کرنا بھی دشوار ہوتا جا رہا ہے۔ انہوں نے اس
صورت حال کو 'راکھ کے نیچے سلگتی ہوئی آگ‘ سے تشبیہ دی۔
گیس کی قلت میں اضافہ
تہران
میں ہیٹر فروخت کرنے والی ایک کمپنی کے سیلز مین امین شعبانی نے کہا کہ بہت سرد
موسم سرما کا امکان تشویش کا باعث ہے۔ ان کے مطابق صارفین گیس کے بجائے بجلی سے چلنے والے ہیٹر خریدنے
پر غور کر رہے ہیں، تاہم بجلی اور گیس دونوں سے متعلق مصنوعات اب اکثر صارفین کی
قوت خرید سے باہر ہوتی جا رہی ہیں۔ انہوں
نے کہا، ''گزشتہ نو ماہ کے دوران جو کچھ ہوا ہے اور بجلی گھروں کو جن حملوں کا
نشانہ بنایا گیا ہے، ان کے پیش نظر یہ فطری بات ہے کہ موسم مزید سرد ہو جانے کے
خدشے پر تشویش پیدا ہو۔ ‘‘ایران دنیا کے بڑے گیس پیدا کرنے والے ممالک میں
شامل ہے اور دنیا کے سب سے بڑے گیس ذخائر میں سے ایک کا حصہ بھی اس کے کنٹرول میں
ہے۔ اس کے باوجود ملک بعض اوقات اپنی اندرونی ضروریات پوری کرنے میں ناکام رہتا ہے۔
اس کی ایک وجہ پرانا اور فرسودہ بنیادی ڈھانچہ ہے، جبکہ بین الاقوامی پابندیوں نے
بھی اس مسئلے کو مزید سنگین بنا دیا ہے۔
ایرانی
حکومت کی ترجمان فاطمہ مہاجرانی نے گزشتہ ہفتے بتایا تھا کہ رواں موسم سرما میں
گیس کی ممکنہ قلت 43 کروڑ مکعب میٹر تک پہنچ سکتی ہے، جبکہ گزشتہ سال یہ مقدار 30
کروڑ مکعب میٹر تھی۔ ایران
کی قومی گیس کمپنی نے قلت میں اضافے کی وجہ جنگ کے ابتدائی دنوں میں چار گیس
پروسیسنگ پلانٹس کو پہنچنے والے نقصان کو بھی قرار دیا ہے۔ کمپنی کے مطابق ان
پلانٹس کی مرمت کی کوششیں جاری ہیں۔ تاہم
سینئر ایرانی عہدیدار نے روئٹرز کو بتایا کہ مسئلے کے حل کے لیے کیے جانے والے
اقدامات محض عارضی نوعیت کے ہیں۔ ان کے مطابق موسم سرما میں پیدا ہونے والے ممکنہ
بحران سے نمٹنے کے لیے متعدد اجلاس بھی منعقد کیے جا چکے ہیں۔
ایرانی شہری اس معاملے پر نسبتاً
مطمئن
روئٹرز
نے ملک کے اندر متعدد ایرانی شہریوں سے پیغام رسانی کی ایک ایپ کے ذریعے رابطہ
کیا، جن میں سے کئی افراد اس معاملے پر نسبتاً مطمئن دکھائی دیے۔ شمال مغربی ایران کے شہر ارومیہ میں رہنے والے 45
سالہ رضا نے بتایا کہ ان کے جاننے والوں میں گیس کی ممکنہ قلت کے حوالے سے زیادہ
تشویش نہیں پائی جاتی۔ ان کے مطابق ان کے خاندان نے احتیاطی تدبیر کے طور پر تین
الیکٹرک ہیٹر خرید لیے ہیں۔ ارومیہ میں موسم سرما کے دوران شدید برف باری ہوتی ہے۔ تبریز میں ایک فوڈ کمپنی میں کام کرنے والی 44 سالہ
زہرہ حسینی نے کہا، ''حقیقت یہ ہے کہ جو کچھ ابھی ہوا بھی نہیں، اس پر میں ابھی سے
رونا دھونا شروع نہیں کرنا چاہتی۔ ہمارے پاس پہلے ہی مہنگائی، بلند قیمتوں اور دیگر مشکلات کی
صورت میں اتنے مسائل موجود ہیں کہ ممکنہ ایندھن کی قلت ان کے مقابلے میں ایک
نسبتاً معمولی مسئلہ دکھائی دیتی ہے۔‘‘ ایرانی
امور کے ماہر سعید لیلاز نے کہا، ''یہ ایک سنگین مسئلہ بن سکتا ہے، تاہم اس سے
نمٹنے کے لیے اقدامات کیے گئے ہیں اور ہم اس صورت حال سے نکل جائیں گے۔ بدترین
صورت میں ہمیں کچھ عرصے کے لیے صنعتی شعبوں کو گیس کی فراہمی بند کرنا پڑ سکتی ہے،
لیکن ابھی ہم اس مرحلے تک نہیں پہنچے۔‘‘ ایک سینئر
ایرانی ذریعے نے بتایا کہ ایران روس سے گیس درآمد کرنے کے لیے مذاکرات کر رہا ہے۔