ویب سائٹ ٹیسٹنگ پلیٹ فارم آپٹیمائزلی (Optimizely) میں ہونے والی
ایک بڑی سیکوریٹی نقب زنی کے باعث زوم، بی بی سی، سی این این، فاکس نیوز، ایچ ایس
بی سی اور آئیکیا (IKEA) سمیت دنیا
کے کم از کم 178 بڑے اداروں کی ویب سائٹس پر آنے والے صارفین کو خطرناک میلویئر کا سامنا
کرنا پڑا ہے۔ سائبر سیکوریٹی فرم رپورٹ یو آر آئی کے مطابق، اس حملے کا
مقصد کرپٹو کرنسی کی ادائیگیاں چرانا اور حساس ڈیٹا حاصل کرنا تھا۔ رپورٹ یو آر آئی نے اپنی تحقیقات میں
آپٹیمائزلی (Optimizely)
کی 1611 اسکرپٹس میں سے 188 میں اس خطرناک کوڈ کی نشاندہی کی۔ فرم کا ماننا ہے کہ متاثرہ تنظیموں
کی اصل تعداد اس سے زیادہ ہو سکتی ہے۔ اس فہرست میں سیلز فورس (Salesforce) ، گٹ لیب (GitLab)
، ایکوی فیکس (Equifax)
، ایئر فرانس-کے ایل ایم، لیجر (Air France-KLM, Ledger) اور پیکاک (Peacock) جیسے بڑے
نام بھی شامل ہیں۔ حملے کا سب سے پہلا ثبوت امریکی مشرقی وقت کے مطابق اتوار کی
رات 11.21 بجے بی
بی سی کے وزیٹرز کو پیش کیے گئے کوڈ میں ملا۔
یہ میلویئر ایک کثیر المقاصد کٹ کی طرح کام کر رہا تھا۔ اس نے
ادائیگی کے دوران کرپٹو کرنسی والٹ کے پتے تبدیل کر کے حملہ آور کے والٹ میں رقم
بھیج دی۔ پیر کی دوپہر بعد 2.25بجے تک حملہ آوروں کے والٹ میں تقریباً 7040 ڈالر کی کرپٹو کرنسی کے لین
دین کی تصدیق ہو چکی ہے۔ اس کے علاوہ، یہ کوڈ پیمنٹ کارڈ کی تفصیلات، براؤزر کوکیز
اور اسکرین شاٹس چرانے کی بھی صلاحیت رکھتا تھا۔ یہ کوڈ آئی فون اور آئی پیڈ کے
پرانے ورژن کو نشانہ بنا رہا تھا، جبکہ نئے ورژن والے آئی فون اور آئی پیڈ کی
معلومات اکٹھا کر رہا تھا۔
سائبر سیکوریٹی ماہرین کے مطابق، حملہ آوروں نے آپٹیمائزلی کے
پروجیکٹ جاوا اسکرپٹ فیچر میں اپنا کوڈ داخل کر دیا تھا۔ چونکہ یہ کوڈ آپٹیمائزلی (Optimizely) کے
قابل اعتماد ڈومین سے آ رہا تھا، اس لیے متاثرہ ویب سائٹس کا اپنا نظام محفوظ
ہونے کے باوجود صارفین اس کا شکار بن گئے۔ آپٹیمائزلی (Optimizely) نے
باضابطہ بیان جاری کر کے اس سکیورٹی واقعے کی تصدیق کی ہے۔ کمپنی نے کہا کہ ایک
غیر مجاز فریق نے اس کے پلیٹ فارم کی کمزوری کا فائدہ اٹھا کر بعض صارفین کے
پروجیکٹس میں یہ کوڈ ڈال دیا تھا۔ کمپنی نے دعویٰ کیا ہے کہ اس نے اس خامی کو دور
کر کے متاثرہ پروجیکٹس سے خطرناک کوڈ ہٹا دیا ہے اور مستقبل میں ایسے حملوں کو
روکنے کے لیے اضافی حفاظتی اقدامات نافذ کیے ہیں۔