اسلام آباد: جاپان کے تعاون سے طالبات کےلئے ماڈل پرائمری اسکول کا افتتاح کردیا گیا

پاکستان میں جاپان کے سفیر اکاماتسو شوئیچی نے ضلع اسلام آباد کے علاقے ترنول میں ٹائن گرلز ماڈل پرائمری اسکول کی تعمیر کے منصوبے کے تحت اسکول کا افتتاح کیا۔ جاپانی سفارت خانے کی پریس ریلیز کے مطابق یہ منصوبہ غیر سرکاری تنظیم کمیونٹی سروسز پروگرام (سی ایس پی) نے مکمل کیا جو پاکستان بھر میں پسماندہ اور کمزور طبقات کی تعلیم، صحت، صاف پانی اور خواتین کو بااختیار بنانے کے لیے کام کر رہی ہے۔

حکومت جاپان نے اپنے گراس روٹس ہیومن سیکیورٹی پروجیکٹس پروگرام کے تحت اس منصوبے کے لیے 44,025 امریکی ڈالر کی مالی امداد فراہم کی۔ افتتاحی تقریب میں سفارت خانہ جاپان کے حکام، سی ایس پی کے نمائندوں، اساتذہ، طالبات، والدین اور علاقہ مکینوں نے شرکت کی۔

جی ایس پی نے اسکول کی تعمیر کامیابی سے مکمل کی ہے جس میں 8 کلاس رومز اور دیگر ضروری سہولیات شامل ہیں، جیسے پرنسپل کا دفتر، واش رومز، ایک ہموار کھیل کا میدان اور 250 طالبات کے لیے کرسیاں۔ سی ایس پی نے اپنے وسائل سے اسکول میں سولر پاور سسٹم، زیر زمین پانی ذخیرہ کرنے کا ٹینک، الیکٹرک واٹر کولر اور ڈیجیٹل لرننگ کے لیے انٹرایکٹو اسمارٹ بورڈ بھی نصب کیا ہے۔

یہ منصوبہ ترنول میں بچیوں کو معیاری تعلیم تک رسائی کے فوری مسئلے کے حل کے لیے شروع کیا گیا جہاں کم عمر بچیوں کو تعلیم کے حصول میں رکاوٹوں کا سامنا ہے۔ نیا تعمیر شدہ اسکول 240 داخل شدہ طالبات کے لیے سیکھنے کے نئے مواقع اور ایک محفوظ، آرام دہ اور جدید تعلیمی ماحول فراہم کرتا ہے جس میں 250 طالبات کی گنجائش موجود ہے۔ تقریب سے خطاب کرتے ہوئے سفیر اکاماتسو نے مشکل موسمی حالات کے باوجود منصوبے کی کامیاب تکمیل پرسی ایس پی کو مبارکباد دی۔

انہوں نے زور دیا کہ تعلیم نہ صرف ایک بنیادی انسانی حق اور انسانی تحفظ کا ایک اہم ستون ہے بلکہ ایک بہتر اور خوشحال معاشرے کی بنیاد بھی ہے اور بچیوں کی تعلیم خاص طور پر پاکستان کے مستقبل کے لیے انتہائی اہم ہے۔ یہی وجہ ہے کہ تعلیم پاکستان میں جاپان کے ترقیاتی تعاون کی ایک کلیدی ترجیح ہے۔ سفیر اکاماتسو نے پاکستان کی پائیدار ترقی کے لیے اپنی حمایت جاری رکھنے کے جاپان کے عزم پر زور دیا اور امید ظاہر کی کہ یہ اسکول جاپان اور پاکستان کے درمیان دیرینہ دوستی اور تعاون کی ایک پائیدار علامت کے طور پر قائم رہے گا۔ اکاماتسو شوئیچی نے پاکستان کی پائیدار ترقی کے لیے اپنی حمایت جاری رکھنے کے لیے جاپان کے عزم پر زور دیا اور امید ظاہر کی کہ یہ اسکول جاپان اور پاکستان کے درمیان دیرینہ دوستی اور تعاون کی لازوال علامت کے طور پر کھڑا رہے گا۔