ٹرمپ کی مقبولیت کم ترین سطح پر پہنچ گئی

امریکی مڈٹرم الیکشن جیسے جیسے قریب آتے جا رہے ہیں ویسے ویسے صدر ڈونلڈ ٹرمپ کی مقبولیت تاریخی کم ترین سطح پر پہنچتی جا رہی ہے، پیو ریسرچ کے ایک نئے سروے کے مطابق صدر ٹرمپ کی مقبولیت کی شرح گر کر اب صرف 30 فی صد رہ گئی ہے۔ یہ کمی خارجہ پالیسی، معیشت اور امیگریشن قوانین کے نفاذ سے متعلق ان کی کارکردگی پر بڑھتی ہوئی عدم اطمینان کے درمیان سامنے آئی ہے۔ جمعرات کو جاری کیے گئے اس سروے کے مطابق، 68 فی صد جواب دہندگان نے ٹرمپ کے اپنے صدارتی فرائض انجام دینے کے طریقۂ کار کو ناپسند کیا۔

2025 میں وائٹ ہاؤس واپسی کے بعد سے ٹرمپ کی مقبولیت کی شرح مسلسل گرتی رہی ہے۔ ان کی موجودہ مقبولیت کی شرح ان کی مدتِ صدارت کے دوران کم ترین شرح کے قریب ہے، جو 6 جنوری 2021 کو کیپیٹل ہل پر حملے کے بعد، ان کی مدتِ صدارت کے آخری دنوں میں 29 فی صد ریکارڈ کی گئی تھی۔ سروے کے مطابق اب 10 میں سے 3 امریکی صدر ٹرمپ کلی کارکردگی سے مطمئن ہیں، جب کہ 68 فی صد امریکی ان کی کارکردگی کو ناپسند کرتے ہیں۔ٹرمپ کی سفیر پر ایک لاکھ ڈالر مانگنے کا الزام، امریکی محکمہ خارجہ کی تحقیقات شروع

صدر ٹرمپ کو 2024 میں ووٹ دینے والوں میں بھی عدم اطمینان بڑھنے لگا ہے، پیو ریسرچ نے نشان دہی کی کہ 2024 میں ٹرمپ کی حمایت کرنے والے ووٹروں میں ان کی مقبولیت کی شرح کم ہوئی ہے، خصوصاً نوجوانوں اور ہسپانوی نژاد ووٹروں میں۔ ٹرمپ کو 2024 میں ووٹ دینے والے ہسپانویوں میں سے اب 57 فی صد ہی ان کی بطور صدر کارکردگی سے مطمئن ہیں۔

سروے سے معلوم ہوا کہ 69 فی صد امریکی صدر ٹرمپ پر یہ اعتماد نہیں کر رہے ہیں کہ وہ اپنے کاروباری مفادات کو صدارتی فیصلے کرنے کے عمل سے الگ رکھ سکتے ہیں، صرف 30 فی صد نے اس اعتماد کا اظہار کیا۔ معیشت، خارجہ پالیسی اور امیگریشن سمیت کئی اہم معاملات سے نمٹنے کی صدر کی صلاحیت پر اعتماد بھی 9 فی صد کم ہو گیا ہے۔ واضح رہے کہ مڈٹرم الیکشن میں ڈیموکریٹس کو ری پبلکنز پر 8 پوائنٹس کی برتری حاصل ہے۔