برطانیہ سے 90 ہزار پناہ گزینوں کی بے دخلی کا منصوبہ

برطانیہ کی سیاسی جماعت ’ریفارم یو کے‘ نے اعلان کیا ہے کہ اقتدار میں آنے کی صورت میں وہ فوری طور پر 90 ہزار پناہ گزینوں کو ملک بدر کرے گی اور پانچ سال کے لیے پناہ کی نئی درخواستوں پر پابندی عائد کرے گی۔ اس منصوبے کے تحت خواتین اور بچوں کو بھی کوئی استثنیٰ حاصل نہیں ہوگا۔ برطانوی اخبار گارڈین کے مطابق جماعت کے رہنما نائجل فاریج نے پیر کو اپنی جماعت کی اب تک کی سخت ترین امیگریشن پالیسیوں کا اعلان کیا۔ ان تجاویز کو مہاجرین کے حقوق کے لیے کام کرنے والی تنظیموں نے ’ناقابلِ عمل‘ قرار دیتے ہوئے برطانیہ کی جنگ متاثرین کو پناہ دینے کی روایت سے انحراف قرار دیا ہے۔