امریکہ میں فلسطین کی حمایت میں مظاہرے اور اسرائیلی فوجی امداد بند کرنے کا مطالبہ

امریکی دارالحکومت واشنگٹن سمیت کئی امریکی شہروں میں فلسطینی عوام کے ساتھ اظہار یکجہتی کے لیے شاندار مظاہرے کیے گئے، جن میں غزہ کی پٹی پر اسرائیلی جارحیت کو روکنے اور قابض دشمن کے لیے امریکی عسکری امداد کے خاتمہ کا پرزور مطالبہ کیا گیا۔ یہ سرگرمیاں جنگ کے آغاز کے تین سال پورے ہونے کے موقع پر "قومی یومِ احتجاج” کی تقریبات کے سلسلے میں منعقد کی گئیں۔ شرکاء نے فلسطینی پرچم اور جنگ کے خاتمے اور اسرائیلی قبضے کے خاتمے کا مطالبہ کرنے والے بینرز اٹھا رکھے تھے۔ وہ غزہ کی پٹی پر جاری جارحیت کی مذمت میں نعرے بازی کر رہے تھے، اس کے ساتھ انہوں نے فلسطینی حقوق کی حمایت اور قابض ریاست کو امریکی امداد کی فراہمی کو مسترد کرنے والی عوامی تحریک کو جاری رکھنے کے عزم کا اعادہ کیا۔

دارالحکومت واشنگٹن میں احتجاج کرنے والے امریکی کانگریس کے صدر مقام کیپٹل بلڈنگ کے سامنے جمع ہوئے۔ انہوں نے قابض اسرائیل کو دی جانے والی عسکری امداد بند کرنے اور فلسطینیوں پر مسلط کردہ جنگ روکنے کے لیے امریکی انتظامیہ پر دباؤ ڈالنے کا مطالبہ کیا۔ یہ یکجہتی کی سرگرمیاں ریاست الینوائے کے شہر شکاگو، ریاست کیلیفورنیا کے شہر لاس اینجلس، ریاست مشی گن کے شہر ڈیئربورن اور ریاست روڈ آئی لینڈ کے شہر پروویڈنس تک پھیل گئیں، جہاں مظاہرین نے جنگ کے خاتمے، قبضے کے انخلا، اور فلسطینی عوام کے خلاف کیے جانے والے جرائم کے ذمہ داروں کے احتساب کے اپنے مطالبات کا اعادہ کیا۔

یہ تحاریک غزہ پٹی پر جنگ کے خاتمے اور قابض اسرائیلی ریاست کو اسلحے کی ترسیل کو بند کرنے کے لیے بین الاقوامی مطالبات کے دائرے کے وسیع ہونے کے سائے میں سامنے آئی ہیں، جبکہ عوامی تحریکیں حکومتوں پر اس بات کے لیے دباؤ بڑھانے کی کوشش کر رہی ہیں کہ وہ فلسطینیوں کو درپیش حالات کے تئیں زیادہ مؤثر موقف اختیار کریں۔ فلسطین کے لیے عالمی اتحاد نے رواں اکتوبر کے اوائل میں اعلان کیا تھا کہ وہ چھ براعظموں میں بیک وقت سرگرمیوں کا اہتمام کرے گا، جس میں ساٹھ سے زائد ممالک کی دو سو سے زیادہ تنظیمیں "اسرائیل” کے محاسبے، بین الاقوامی قانون کے نفاذ، اور اسے اسلحے کی فراہمی کو بند کرنے کا مطالبہ کرنے کے لیے شریک ہوں گی۔

اسی سیاق و سباق میں، فلسطینی نیشنل انیشی ایٹو موومنٹ کے سیکرٹری جنرل مصطفیٰ البرغوثی نے دنیا بھر میں فلسطین کی نصرت کے لیے عالمی اتحاد کی اس تیاری کا اعلان کیا کہ وہ دنیا بھر میں درجنوں مظاہروں اور تقریبات کا اہتمام کرے گا، جن میں امریکہ میں چالیس سے زیادہ جلوس اور تقاریب شامل ہیں، اس کے علاوہ یورپی، ایشیائی اور افریقی ممالک میں بھی ایسے تحاریک ہوں گی، جو غزہ پر جنگ کے تسلسل اور مغربی کنارے اور مقبوضہ بیت المقدس میں اسرائیلی حملوں کو مسترد کرتی ہیں۔