اوکیناوا میں جاپانی خاتون کے قتل کے الزام میں امریکی اہلکار گرفتار

جاپان کے جنوبی جزیرے اوکیناوا میں ایک 39 سالہ جاپانی خاتون انا یاگی Anna Yagi کو ناہا   Nahaکے ایک ہوٹل میں قتل کرنے اور ان کا بیگ و بٹوا چرانے کے شبہے میں 20 سالہ امریکی میرین اہلکار (ڈیون جیکب بالارڈ Devin Jacob Ballard,) کو گرفتار کر لیا گیا ہے، تاہم ملزم نے اس الزام سے صاف انکار کیا ہے۔ پولیس کے مطابق جائے وقوعہ کے قریب لگے سی سی ٹی وی کیمروں کی فوٹیج میں ایک غیر ملکی شخص کو مقتولہ کے ساتھ کمرے میں داخل ہوتے اور بعد میں اکیلے ان کے سامان کے ساتھ باہر نکلتے ہوئے دیکھا گیا ہے۔

اس ہولناک واقعے پر جاپان کی وزیراعظم سانائے تاکائیچی Sanae Takaichi نے امریکی حکام سے شدید احتجاج کرتے ہوئے اس عمل کو انتہائی سفاکانہ قرار دیا ہے اور امریکی فوج سے مطالبہ کیا ہے کہ وہ تحقیقات میں بھرپور تعاون کریں، اپنے اہلکاروں میں نظم و ضبط کو سخت کریں اور مستقبل میں ایسے واقعات کی روک تھام کے لیے مؤثر اقدامات اٹھائیں۔ دوسری جانب امریکی سفیر جارج گلاس نے بھی جاپانی حکام اور اوکیناوا کے گورنر سے گہرے دکھ اور تعزیت کا اظہار کرتے ہوئے تحقیقات میں مکمل تعاون کی یقین دہانی کرائی ہے۔ واضح رہے کہ اوکیناوا میں امریکی فوجی اہلکاروں کی طرف سے ہونے والے جرائم طویل عرصے سے مقامی آبادی میں شدید احتجاج کا سبب بنتے رہے ہیں اور اس سے جاپان و امریکا کے باہمی تعلقات میں بھی تناؤ پیدا ہوتا ہے، کیونکہ جاپان میں تعینات تقریباً 54 ہزار امریکی فوجیوں میں سے بڑی تعداد اسی جزیرے پر موجود ہے جہاں ملک کے تمام امریکی فوجی اڈوں کا تقریباً 70 فیصد حصہ واقع ہے۔