مصر بھی جنگ میں ایران اور اس کی پراکیسز کے خلاف داخل

حقیقت میں دیکھا جائے تو یہی توقع کی جا رہی تھی کہ مصر بھی خلیج کے محاذ پر اس جنگ میں ایران اور اس کی پراکیسز کے خلاف داخل ہو جائے گا۔ مصر کی یہ شمولیت علاقائی سطح پر طاقت کا توازن برقرار رکھنے کے ساتھ ساتھ اس کے اپنے انتہائی مفاد میں ہے۔ مصر کا یہ تازہ اعلان کہ وہ جنگ میں حصہ لینے کے لیے تیار ہے۔ اس سے ہم توقع کر سکتے ہیں کہ سرکاری مصری موقف کیا ہے اور وہ شکوک و شبہات اور تنقید کے مختلف مخاصمانہ حلقوں کا کیسے سامنا کر سکتا ہے؟ لیکن سوال یہ ہے کہ 10 ماہ سے مصر نے اس مؤقف کا اظہار کیوں نہ کیا اور جنگ کا حصہ بننے سے گریزاں کیوں رہا؟ کیا یہ فیصلہ سعودی عرب کی طرف سے مصر کے لیے مالی امداد سے جڑا ہوا ہے یا محض زبانی وعدوں سے اس کا تعلق ہے؟ قطع نظر اس کے اب مصر اس جنگ کا حصہ بننے جا رہا ہے، وہ یہ چاہتا تھا یا نہیں چاہتا تھا۔ اسے بھی براہ راست راکٹ حملوں کا سامنا کرنا پڑا ہے۔ جبکہ ایرانی حمایت یافتہ حوثی گروپ اور عراقی ملیشیائیں پہلے ہی مصر کے خلاف بھی دھمکیاں دے چکی ہیں۔

مصر نے تین برسوں تک حوثی حملوں کی وجہ سے بھاری قیمت ادا کی ہے۔ بحیرہ احمر میں جہاز رانی پر ہونے والے حوثی حملوں کے نتیجے میں مصر کو بھی غیر ملکی زر مبادلہ کی صورت میں ہونے والی آمدنی متاثر ہوئی ہے۔ اسی طرح اسے بھاری ٹیکسز کے علاوہ دیگر مضمرات کا بھی سامنا کرنا پڑا ہے۔ حتیٰ کہ لیبیا، سوڈان اور غزہ کی وجہ سے بھی۔

بین الاقوامی اعداد و شمار اور تخمینوں کے مطابق مصر کو صرف نہر سویز کے حوالے سے سالانہ بنیادوں پر 6 ارب ڈالر کا نقصان برداشت کرنا پڑ رہا ہے۔ یہ سارے نقصانات ایسے ماحول میں ہیں کہ جب مصر پہلے ہی معاشی بوجھ تلے ہے اور خلیجی ملکوں میں کام کرنے والے مصری شہریوں کا روزگار بھی متاثر ہو رہا ہے۔ 50 لاکھ سے زیادہ مصری شہری مختلف خلیجی ملکوں میں روزگار سے وابستہ ہیں۔ لیکن اس جنگی صورتحال میں ان کے روزگار اور آمدنیاں متاثر ہوئی ہیں۔ کیونکہ اس کشیدگی نے ان تمام ملکوں کی تیل و گیس کی برآمدات کو بری طرح متاثر کیا ہے۔

صدر عبدالفتاح السیسی کے زیر قیادت مصر کی یہ بھرپور کوشش رہی ہے کہ وہ کبھی بھی جنگ کا حصہ نہیں بنے گا۔ یہاں تک کہ یہ کشیدگی و تصادم جو خلیج میں جاری ہے مصر کو بھی نشانے پر لے لے اور اس کے پاس کوئی اور چوائس نہ بچے۔ مصر کے لیے پیدا ہونے والے چیلنجز اور خطرات عام مصریوں کی روز مرہ کی اشیائے ضروریہ کو بھی بری طرح متاثر کر رہے ہیں۔ اسی طرح اگر ایران خلیجی ملکوں کے مقابلے میں غلبہ حاصل کرتا ہے تو اس کے علاقائی طور پر اثرات مصر کے حق میں بھی اچھے نہیں ہوں گے۔ حتیٰ کہ مصر کی قومی سلامتی کے لیے بھی خطرات پیدا ہو سکتے ہیں۔ مصر ماضی میں خلیجی حکومتوں کی طرح ایران کے ساتھ ایک غیر علانیہ کشیدگی میں رہا ہے کہ ایرانی رجیم اخوان المسلون کی ابھرتی ہوئی طاقت کی حامی رہی ہے۔ حتیٰ کہ ایرانی رجیم اخوان المسلمون کو اپنے مختلف انیشی ایٹیوز کے ساتھ مدد دینے کی کوشش میں رہی۔ تاکہ اس کا مصری ریاست پر کنٹرول مضبوط و مستحکم ہو جائے۔

اس سارے تناظر میں مصری صدر عبدالفتاح السیسی کا یہ اعلان کہ ہم جنگ میں داخل ہونے کے لیے تیار ہیں ایران کے لیے ایک واضح اور کھلا پیغام ہے۔ جو اس سے پہلے خلیجی ملکوں کی تقسیم سے فائدہ اٹھاتا رہا ہے اور ان خلیجی ممالک کو کمزوری و تنہائی کی طرف دھکیلتا رہا ہے۔

یہ سوال کہ مصر نے اب جس طرح کی کارروائی کا اعلان کیا ہے کئی ماہ پہلے ایسا کیوں نہیں کیا۔ ممکن ہے اس سلسلے میں بعض قابل فہم ملحوظات مصر کے سامنے رہے ہوں۔ جنگ کا حصہ بننے کے لیے وقت کا انتخاب یا بات چیت کو موقع دینے کی خواہش۔ تاکہ مفاہمت کی کوئی صورت گری ہو سکے اور اس امر سے گریز کہ وہ ایران کے خلاف واشنگٹن اور اسرائیل کی جنگ کا حصہ بنے۔ کچھ وجہ یہ بھی ہو سکتی ہے کہ قاہرہ اس کے بدلے میں معاشی فوائد حاصل کرنا چاہتا ہو۔ لیکن یہ سوال ان سب سے بالاتر ہے کہ ایران کے عروج کی قیمت مصر کو ادا کرنا ہوگی۔ اس لیے قاہرہ اپنے مفادات کے تحفظ کے لیے کارروائی کرنا چاہتا ہے۔ تاکہ اپنے اثرات اور معیشت دونوں کو بچا سکے۔ اگر مصر ایسا نہیں کرتا تو اس کا صاف مطلب ہے کہ تہران ایک بار پھر مصر کے اندرونی معاملات میں مداخلت کرے گا اور اسے غیر مستحکم کرنے کی کوشش کر سکتا ہے۔ جیسا کہ وہ اس سے پہلے بھی کر چکا ہے۔ مصر کو اپنی معاشی سلامتی کا تحفظ بھی کرنا ہے۔ حوثیوں اور ایران کی کارروائیاں نہر سویز کو سالانہ 6 ارب ڈالر کا نقصان پہنچانے کا سبب بن رہی ہیں اور پچھلے 3 برسوں میں یہ نقصان مجموعی طور پر 18 ارب ڈالر کا ہو چکا ہے۔ کیونکہ دنیا کے مال بردار جہاز اپنی سلامتی کے خوف کی وجہ سے نہر سویز سے گزرنے سے گریز کر رہے ہیں۔ اس کا ایک نقصان یہ بھی ہو رہا ہے کہ مصر میں اشیائے ضروریہ کی قیمتیں بھی عام لوگوں کے لیے بہت مہنگی ہونے لگی ہیں۔

اس ساری بحث کے بعد بھی جو سوال حتمی طور پر موجود ہے وہ یہ ہے کہ کیا مصر کا جنگ میں حصہ لینا زمین پر فوجی توازن کو تبدیل کر سکے گا؟ اس سوال کے جواب میں یہی کہا جا سکتا ہے کہ اس کا انحصار مصر کی شمولیت کی نوعیت اور سطح پر ہوگا۔ جو ابھی واضح نہیں ہے کہ مصر اس جنگ میں کس حد تک آگے جائے گا۔