Environment
دنیا بھر میں ایک تہائی سے زیادہ یا ڈیڑھ ارب خواتین اور لڑکیاں موسمیاتی خطرات کے حوالے سے انتہائی حساس علاقوں میں رہتی ہیں جہاں سمندری طوفان اور خشک سالی جیسے قدرتی خطروں کے ساتھ غیر محفوظ روزگار اور صنفی عدم مساوات جیسے مسائل ان کی مشکلات م
دنیا بھر میں ایک تہائی سے زیادہ یا ڈیڑھ ارب خواتین اور لڑکیاں موسمیاتی خطرات کے حوالے سے انتہائی حساس علاقوں میں رہتی ہیں جہاں سمندری طوفان اور خشک سالی جیسے قدرتی خطروں کے ساتھ غیر محفوظ روزگار اور صنفی عدم مساوات جیسے مسائل ان کی مشکلات میں اضافہ کر رہے ہیں۔ صنفی مساوات کے لیے اقوام متحدہ کے ادارے 'یو این ویمن' کی جانب سے جاری کردہ ایک نئی رپورٹ میں بتایا گیا ہے کہ موسمیاتی بحران نہ صرف زندگی کے لیے خطرہ بن رہا ہے بلکہ ایسی عدم مساوات کو بھی مزید گہرا کر رہا ہے جس سے خواتین اور لڑکیاں سب سے زیادہ متاثر ہو رہی ہیں۔ موسمیاتی تبدیلیوں کی سب سے بھاری قیمت ان ممالک کی خواتین اور لڑکیوں کو چکانا پڑتی ہے جو ان تبدیلیوں کے ذمہ دار سب سے کم ہیں۔ 'موسمیاتی بحران کے دور میں صنفی مساوات' کے عنوان سے یہ رپورٹ ترکیہ کے شہر انطالیہ میں اقوام متحدہ کی عالمی موسمیاتی کانفرنس (کاپ 31) کے موقع پر جاری کی گئی ہے۔
رپورٹ میں خبردار کیا گیا ہے کہ اگر موجودہ رجحانات برقرار رہے تو 2050 تک کرہ ارض کا درجہ حرارت صنعتی دور سے پہلے کی سطح کے مقابلے میں 1.8 ڈگری سینٹی گریڈ تک بڑھ سکتا ہے جس کے نتیجے میں خشک سالی، سیلاب، جنگلات کی آگ اور سمندری طوفانوں کی شدت میں مزید اضافہ ہو گا۔ 'یو این ویمن' کے مطابق، موسمیاتی تبدیلیوں کے بدترین ممکنہ منظرنامے میں رواں صدی کے وسط تک مزید 14 کروڑ 10 لاکھ خواتین اور لڑکیاں شدید غربت کا شکار ہو سکتی ہیں۔ ادارے کی ایگزیکٹو ڈائریکٹر سیما بحوث (Sima Bahous) نے کہا ہے کہ دنیا بھر میں خواتین پہلے ہی بہتر مستقبل کی جدوجہد میں پیش پیش ہیں۔ انہیں مساوی حقوق، وسائل اور قیادت کے مواقع فراہم کرنا ضروری ہے کیونکہ وہی دنیا کو اس تبدیلی کی جانب لے جانے میں مدد دے سکتی ہیں جس کی آج اشد ضرورت ہے۔
24 ممالک سے حاصل کردہ اعداد و شمار کے مطابق، اوسط درجہ حرارت میں ایک ڈگری سینٹی گریڈ اضافے سے خواتین کی مجموعی آمدنی میں مردوں کے مقابلے میں 34 فیصد زیادہ کمی واقع ہو سکتی ہے۔ رپورٹ کے مطابق، اس کی ایک بڑی وجہ یہ ہے کہ فصلیں تباہ ہونے کی صورت میں خواتین کے لیے زرعی شعبے سے ہٹ کر دیگر روزگار اختیار کرنا یا دوسرے علاقوں کی جانب نقل مکانی کرنا نسبتاً زیادہ مشکل ہوتا ہے۔ موسمیاتی تبدیلیوں کے باعث خواتین کی بلا معاوضہ گھریلو اور نگہداشت کی ذمہ داریاں بھی بڑھ رہی ہیں۔ ان میں پانی اور ایندھن جمع کرنا اور قدرتی آفات کے بعد خاندان کے افراد کی دیکھ بھال کرنے جیسے کام شامل ہیں۔ موسمیاتی تبدیلیاں صنفی بنیاد پر تشدد کے پہلے سے موجود اسباب کو بھی مزید سنگین بنا رہی ہیں۔ 14 ممالک کے اعداد و شمار سے ظاہر ہوتا ہے کہ طویل عرصہ تک شدید خشک سالی کا سامنا کرنے والے علاقوں میں نوعمر لڑکیوں اور نوجوان خواتین کے خلاف جنسی تشدد کے امکانات 21 فیصد زیادہ ہوتے ہیں۔
موسمیاتی بحران کم عمری کی شادیوں کے خاتمے کے لیے کی جانے والی کوششوں کو بھی متاثر کر رہا ہے۔ رپورٹ کے مطابق 46 میں سے 24 ممالک کے خشک علاقوں میں کم عمری کی شادیوں کی شرح دیگر کے مقابلے میں زیادہ پائی گئی۔ دوسری جانب، مصنوعی ذہانت (اے آئی) کی ٹیکنالوجی کے باعث توانائی کی طلب میں مسلسل اضافہ ہو رہا ہے، لیکن اس کے باوجود دنیا بھر میں 32 کروڑ 60 لاکھ خواتین اور لڑکیاں اب بھی بجلی کی سہولت سے محروم ہیں۔
ماحولیاتی کارکنوں کے لیے خطرات
رپورٹ کے مطابق، 73 فیصد ممالک کے موسمیاتی لائحہ عمل میں خواتین اور لڑکیوں کو درپیش خطرات کا اعتراف تو کیا گیا ہے، تاہم ان میں صرف ایک تہائی سے کچھ زیادہ ممالک نے ہی ان خطرات سے نمٹنے کے لیے جامع اقدامات کیے ہیں۔ موسمیاتی تبدیلیوں سے متعلق فیصلوں میں خواتین کی نمائندگی اب بھی انتہائی محدود ہے۔ توانائی کے شعبے کی وزارتوں اور محکموں میں خواتین کا حصہ صرف 12 فیصد ہے۔ تحفظ ماحول کے لیے آواز اٹھانے والی خواتین کارکنوں کو ہراسانی، تشدد حتیٰ کہ موت جیسے خطرات کا سامنا بھی کرنا پڑ رہا ہے۔ کاپ 31 کے موقع پر 'یو این ویمن' نے عالمی رہنماؤں پر زور دیا ہے کہ وہ موسمیاتی اقدامات میں صنفی مساوات اور خواتین کے حقوق کو مرکزی حیثیت دیں۔ اس میں ہر خاتون اور لڑکی کے صاف، صحت مند اور پائیدار ماحول میں زندگی گزارنے کے حق کو تسلیم کرنا اور اس کی ضمانت دینا بھی شامل ہے۔
