جنوبی سوڈان کو انتخابات سے قبل سلامتی کے مسائل کا سامنا، یو این: خود کش کے بعد اب ڈرون حملے

اقوام متحدہ کی سلامتی کونسل کو بتایا گیا ہے کہ جنوبی سوڈان میں سیاسی اتفاق رائے کمزور رہا ہے اور سلامتی کی بگڑتی ہوئی صورتحال تشویش ناک رخ اختیار کر رہی ہے جہاں 22 دسمبر کو ہونے والے انتخابات سے قبل سنگین مسائل درپیش ہیں۔ ملک کے لیے اقوام متحدہ کی خصوصی نمائندہ انیتا کیکی گیبوہ  (Anita Kiki Gbeho) نے کونسل کو بریفنگ دیتے ہوئے کہا ہے کہ ملک ایک اہم موڑ پر کھڑا ہے۔ اگرچہ انتخابات کی تیاریاں تیزی سے جاری ہیں تاہم عبوری دور کے حوالے سے سیاسی اتفاق رائے تیزی سے کمزور ہو رہا ہے۔ انتخابی عمل کی تیاریوں پر بھی کئی سوالات موجود ہیں جن میں سکیورٹی اور انتظامات، قومی الیکشن کمیشن کی محدود وقت میں انتخابات کرانے کی صلاحیت اور امن معاہدے کی باقی ماندہ شقوں پر عملدرآمد شامل ہیں۔ انہوں نے نشاندہی کی کہ حالیہ سیاسی تبدیلیوں کے باعث امن معاہدے میں خواتین کی نمائندگی کے لیے مقرر کردہ 35 فیصد کوٹے پر بھی عمل نہیں ہو سکا۔ انتخابات کو عبوری عمل کے اختتام کے بجائے اس کا ایک اہم سنگ میل ہونا چاہیے۔ انتخابات سیاسی مکالمے، باہمی اعتماد کی بحالی اور امن معاہدے پر مسلسل عملدرآمد کا متبادل نہیں ہو سکتے۔

سلامتی کے بڑھتے مسائل

انیتا گیبوہ  (Anita Kiki Gbeho) نے سلامتی کی صورتحال پر بات کرتے ہوئے کہا کہ ملک میں حالات مزید پیچیدہ ہو گئے ہیں تاہم سیاسی صورتحال نازک ہونے کے باوجود اب تک ماضی کی طرح بڑے پیمانے پر مسلح تصادم دیکھنے میں نہیں آیا۔ دستیاب اعداد و شمار کے مطابق، امن معاہدے پر دستخط کرنے والے اہم فریقین کے درمیان مسلح جھڑپوں میں مجموعی طور پر کمی آئی ہے لیکن مقامی سطح پر تشدد، سیاسی اختلافات اور برادریوں کے درمیان کشیدگی میں اضافہ ہوا ہے۔ ان عوامل سے ملک کی مجموعی سکیورٹی صورتحال پر اعتماد متاثر ہو رہا ہے۔ انہوں نے خبردار کیا کہ ان کشیدگیوں کے برقرار رہنے سے سیاسی اور انسانی بحران کی موجودگی میں پہلے سے موجود کمزوریوں میں اضافہ ہو سکتا ہے اور مختلف علاقوں میں تناؤ میں شدت آ سکتی ہے۔

بگڑتی انسانی صورتحال

انہوں نے ملک میں جاری انسانی بحران پر تشویش کا اظہار کرتے ہوئے کہا کہ تقریباً ایک کروڑ افراد کو انسانی امداد کی ضرورت ہے۔ سوڈان میں لڑائی شروع ہونے کے بعد تقریباً 14 لاکھ افراد سرحد پار کرکے جنوبی سوڈان پہنچ چکے ہیں جبکہ ملک میں تقریباً 75 لاکھ افراد کو غذائی عدم تحفظ کا سامنا ہے۔ قحط کے خطرے سے دوچار افراد کی تعداد بھی بڑھ رہی ہے۔ طویل خشک سالی اور ال نینو کے باعث متوقع سیلابی صورتحال انسانی بحران کو مزید سنگین بنا سکتی ہے۔ ان کا کہنا تھا کہ خطے میں ایبولا وائرس کی وبا بھی خطرات میں اضافے کا باعث بن رہی ہے جس کے پیش نظر بیماری سے نمٹنے کی تیاریوں، باہمی تعاون اور ہنگامی ردعمل کو مزید موثر بنانے کی ضرورت ہے۔

جنگ بندی کی پابندی کا مطالبہ

خصوصی نمائندہ نے ملک میں جاری لڑائی فوری طور پر روکنے کی ضرورت پر زور دیتے ہوئے تمام فریقین سے اپیل کی کہ وہ تحمل کا مظاہرہ کریں، شہریوں کا تحفظ یقینی بنائیں اور جنگ بندی کی پابندی کریں۔ انہوں نے کہا کہ سیاسی مذاکرات مزید موخر نہیں کیے جا سکتے۔ جنوبی سوڈان کی قیادت کو چاہیے کہ وہ امن معاہدے کی باقی ماندہ شقوں اور انتخابات کے بعد ملک کے سیاسی مستقبل کے حوالے سے وسیع البنیاد اور جامع مذاکرات کا آغاز کرے۔ کامیابی کا اصل پیمانہ بہت سادہ ہےکہ آیا جنوبی سوڈان کے شہری کل آج کے مقابلے میں زیادہ محفوظ ہوں گے؟ 

دوسری جانب  ڈرون حملے اور خشک سالی سوڈان کو اپنی لپیٹ میں لے رہے ہیں۔ اقوام متحدہ کے ادارہ اطفال (یونیسیف) نے خبردار کیا ہے کہ ملک کا بنیادی ڈھانچہ متحارب فریقین کے حملوں کی زد میں ہے جن میں ایسے ڈرون بھی استعمال ہو رہے ہیں جو 1,500 کلومیٹر دور اپنے ہدف کو نشانہ بنا سکتے ہیں۔ یونیسیف کے ترجمان جیمز ایلڈر  (James Elder) نے کہا ہے کہ سوڈان میں اس نوعیت کے حملے پہلے کبھی نہیں دیکھے گئے۔ اکتوبر کے آخری ہفتے میں ایک بھی دن ایسا نہیں گزرا جب ملک کے کسی بجلی گھر کو ڈرون حملے کا نشانہ نہ بنایا گیا ہو۔ صرف اکتوبر کے مہینے میں ہی 15 بجلی گھروں پر حملے کیے گئے۔ پہلے اس جنگ میں خودکش ڈرون سے حملے کیے جا رہے تھے جبکہ اب فریقین کے پاس درستگی سے دور دراز ہدف کو نشانہ بنانے والے ڈرون ہیں۔ رواں سال سوڈان میں جنگ کے دوران ہلاک ہونے والے بچوں میں سے دو تہائی انہی ڈرون حملوں کا نشانہ بنے۔ یہ ڈرون جنگ کو ان علاقوں تک لے جا رہے ہیں جو کبھی محفوظ سمجھے جاتے تھے۔

زندگیاں کچلتی جنگ

جیمز ایلڈر  (James Elder) نے سوڈان کے دورے سے واپسی پر جنیوا میں صحافیوں سے بات کرتے ہوئے جنگ سے متاثرہ ایک نو عمر لڑکے کی داستان سنائی جس سے ان کی ملاقات الابیض شہر میں ہوئی تھی۔ اقوام متحدہ کی انسانی حقوق کونسل کے تحقیق کاروں کے مطابق یہاں کے باسی ہر وقت ڈرون حملوں کے خوف میں زندگی گزار رہے ہیں۔ جیمز ایلڈر  (James Elder) نے بتایا کہ بوری نامی یہ نوعمر لڑکا ایک دھماکے میں اپنے دونوں ہاتھ کھو چکا ہے اور اب ایک خیمے میں رہتا ہے۔ وہ صبح کے وقت آن لائن تعلیم حاصل کرتا ہے اور دوپہر کو اپنے بازوؤں سے مویشیوں کے لیے گھاس جمع کرتا ہے۔ اس کے دوست اس کام میں اس کی مدد کرتے ہیں۔ جیمز ایلڈر (James Elder)  نے کہا کہ یہی سوڈان کی حقیقت ہے۔ ایک ایسی جنگ جو تھمنے کا نام نہیں لے رہی اور لوگوں کو مسلسل کچل رہی ہے۔

پانی اور خوراک کا بحران

ترجمان نے کہا کہ یوکرین کی طرح سوڈان میں بھی توانائی کے شعبے کو مسلسل حملوں کا سامنا ہے تاہم دونوں ممالک میں ایک بڑا فرق یہ ہے کہ یوکرین میں تباہ ہونے والی تنصیبات کی مرمت کی جاتی ہے جبکہ سوڈان میں ایسا نہیں ہو رہا۔ انہوں نے وضاحت کی کہ جب کسی بجلی گھر پر حملہ ہوتا ہے تو پانی کی فراہمی کے پمپ بند ہو جاتے ہیں اور پانی صاف کرنے کا نظام بھی کام کرنا چھوڑ دیتا ہے۔ نتیجتاً لوگوں کو پانی کے حصول کے لیے مہنگے اور غیر محفوظ متبادل ذرائع استعمال کرنا پڑتے ہیں۔ اس صورتحال میں بیماریاں بھی پھیل رہی ہیں جبکہ جنگ کے باعث ویکسین اور ادویات کو محفوظ درجہ حرارت پر رکھنے کا نظام بھی شدید خطرے سے دوچار ہے۔ ان حالات میں کسانوں کے لیے فصلوں کو پانی دینا بھی مشکل ہوتا جا رہا ہے، کیونکہ آبپاشی کے پمپ بجلی پیدا کرنے والے جنریٹروں سے چلتے ہیں اور ایندھن کی شدید قلت کے باعث انہیں چلانا انتہائی مہنگا ہو گیا ہے۔ یہ سب کچھ ایسے وقت ہو رہا ہے جب اندازہ ہے کہ رواں سال سوڈان میں پانچ سال سے کم عمر کے 8 لاکھ سے زیادہ بچے شدید ترین غذائی قلت کا شکار ہوں گے جو کہ جان لیوا ثابت ہو سکتی ہے۔ یونیسیف اور اس کے شراکتی ادارے اب تک لاکھوں بچوں کا شدید ترین غذائی قلت کی جان لیوا قسم کے خلاف علاج کر چکے ہیں۔ ادارے نے 25 لاکھ سے زیادہ لوگوں کو طبی سہولیات فراہم کی ہیں جبکہ لاکھوں بچوں کو مہلک بیماریوں سے بچاؤ کے ٹیکے بھی لگائے گئے ہیں۔