کاپ 31: معدنی ایندھن کی بجائے ماحول دوست توانائی پر توجہ مرکوز

ترکیہ کے شہر انطالیہ میں جاری عالمی موسمیاتی کانفرنس (کاپ 31) کے دوسرے روز توانائی کے عالمی نظام میں تبدیلی کا موضوع زیربحث رہا جہاں رکن ممالک نے اس بات پر غور کیا کہ کوئلے، تیل اور گیس سے کیسے چھٹکارا حاصل کیا جائے، ماحول دوست توانائی کا استعمال کیسے بڑھایا جائے اور اس راہ میں حائل مالی اور بنیادی ڈھانچے کی رکاوٹوں کو کیسے دور کیا جائے۔

کانفرنس کے دوسرے دن کی جھلکیاں

برازیل نے ماحول دوست توانائی کی جانب منتقلی کا لائحہ عمل پیش کیا جبکہ اقوام متحدہ کے سیکرٹری جنرل انتونیو گوتیرش  (Antonio Guterres) نے حیاتیاتی ایندھن پر مسلسل انحصار کی معاشی قیمت سے خبردار کیا۔·         ترکیہ نے دنیا بھر میں بجلی کے استعمال کو تیز کرنے کے لیے اپنا 35 بائی 35 منصوبہ پیش کیا۔ کانفرنس کےشرکا کو بتایا گیا کہ بجلی کی ترسیل کے پرانے یا ناکافی نظام اور مہنگی مالی معاونت ماحول دوست توانائی کی جانب منتقلی کی رفتار کو سست کر سکتے ہیں۔ انتونیو گوتیرش  (Antonio Guterres) نے برازیل کی جانب سے لائحہ عمل کے اجرا پر کہا کہ حیاتیاتی ایندھن پر انحصار ختم کرنے کے عمل کو کسی ممنوع یا ناقابل عمل معاملے کے طور پر دیکھنے کا وقت گزر چکا ہے۔ مشرق وسطیٰ میں حالیہ کشیدگی میں اضافے کے بعد یورپی یونین کو ہی حیاتیاتی ایندھن کی درآمد پر 100 ارب یورو سے زیادہ اضافی اخراجات کرنا پڑے ہیں جبکہ 130 ممالک میں پیٹرول اور ڈیزل کی قیمتوں میں نمایاں اضافہ ہوا ہے۔ انہوں نے کہا کہ صرف ایندھن فراہم کرنے والے ممالک تبدیل کرنے سے یہ خطرہ ختم نہیں ہو گا کیونکہ دنیا کے کسی بھی حصے میں پیدا ہونے والا خلل ہر جگہ قیمتوں میں اضافے کا سبب بنتا ہے۔

'لائحہ عمل حکم نامہ نہیں'

برازیل کی جانب سے یہ لائحہ عمل پہلی مرتبہ 3 نومبر کو جاری کیا گیا تھا، تاہم اسے باضابطہ طور پر کاپ 31 میں پیش کیا گیا ہے۔ اس کا مقصد حیاتیاتی ایندھن سے انحصار ختم کرنے کے عالمی عزم کو مختلف ممالک کے قومی موسمیاتی منصوبوں کا حصہ بنانا ہے۔ اس حوالے سے ہر ملک کو مختلف نوعیت کے مسائل کا سامنا ہے۔ تیل اور گیس پیدا کرنے والے ممالک کو مستقبل میں آمدنی میں ممکنہ کمی اور روزگار و صنعتوں میں تبدیلیوں کے لیے تیاری کرنا ہو گی جبکہ درآمدی ایندھن پر انحصار کرنے والے ممالک کو ایسے متبادل ذرائع تیار کرنا ہوں گے جو انہیں عالمی منڈی میں توانائی کی قیمتوں کے اتار چڑھاؤ سے محفوظ رکھ سکیں۔ دونوں طرح کے ممالک کے لیے اصل مسئلہ یہ ہے کہ ماحول دوست توانائی کی جانب منتقلی کو ممکن بنانے کے لیے درکار سرمایہ کاری، بنیادی ڈھانچہ اور عالمی تعاون کیسے حاصل کیا جائے۔

گزشتہ سال برازیل کی کاپ صدارت کی چیف ایگزیکٹو آفیسر اینا ٹونی  (Ana Toni) نے بتایا کہ اس روڈ میپ میں تین باہم منسلک پہلوؤں کا جائزہ لیا گیا ہے جن میں حیاتیاتی ایندھن کی طلب، ان کی پیداوار اور رسد اور ان سے بتدریج چھٹکارا حاصل کرنے کے معاشی اثرات شامل ہیں۔ اس میں رکن ممالک کو اپنی تیاریوں کا جائزہ لینے، رکاوٹوں کی نشاندہی کرنے اور آئندہ اقدامات کی منصوبہ بندی کے لیے مختلف اشاریے بھی فراہم کیے گئے ہیں۔ اس کے ساتھ عالمی تعاون بڑھانے کے لیے تجاویز بھی شامل ہیں۔ یہ لائحہ عمل رضاکارانہ نوعیت کا ہے اور اسے کوئی نیا لازمی ماحولیاتی معاہدہ نہیں کہا جا سکتا۔ تاہم سیکرٹری جنرل نے رکن ممالک پر زور دیا کہ وہ واضح ٹائم لائنز اور مالی ضروریات کے ساتھ اپنے قومی موسمیاتی منصوبے تیار کریں اور 2028 تک قابل پیمائش پیش رفت دکھائیں۔

ماحول دوست بجلی کی جانب منتقلی

ترکیہ نے بھی ایک اہم ہدف مقرر کیا ہے جس کا مقصد عالمی توانائی کی مجموعی کھپت میں بجلی کا حصہ موجودہ 20 فیصد سے بڑھا کر 2035 تک 35 فیصد کرنا ہے۔ 35 بائی 35 کے نام سے پیش کیا گیا عالمی برقی توانائی کا عہد بظاہر تکنیکی نوعیت کا معلوم ہوتا ہے لیکن اس کا تصور سادہ ہے یعنی ڈیزل پر چلنے والی بسوں کی جگہ الیکٹرک بسوں کا استعمال، گیس کے بجائے بجلی سے گھروں کو گرم کرنا اور فیکٹریوں کو بجلی پر منتقل کرنا۔ تاہم اس اقدام سے ماحولیاتی فوائد حاصل کرنے کے لیے ضروری ہے کہ استعمال ہونے والی بجلی زیادہ سے زیادہ صاف اور قابل تجدید ذرائع سے پیدا کی جائے۔ کاپ 31 میں زیر بحث ایک اور اہم موضوع بجلی کا ترسیلی نظام ہے۔ اقوام متحدہ کے اقتصادی کمیشن برائے یورپ (یو این ای سی ای) سے وابستہ ڈیریو لیگوتی نے یو این نیوز کو بتایا کہ دنیا بھر میں تقریباً 2500 گیگاواٹ بجلی پیدا کرنے کی صلاحیت رکھنے والے اور دیگر منصوبے بجلی کے ترسیلی نظام سے منسلک ہونے کے منتظر ہیں۔ بعض منصوبوں کو گرڈ سے منسلک ہی نہیں کیا جا سکتا جبکہ بعض کو اپنی بجلی کی پیداوار کم کرنا پڑتی ہے کیونکہ موجودہ نیٹ ورک اتنی بجلی منتقل کرنے کی صلاحیت نہیں رکھتا۔ انہوں نے اس مسئلے کے حل کے لیے دو اقدامات پر زور دیا جن میں بجلی کے ترسیلی نظام کی استعداد میں اضافہ کرنا اور اس کے معیار کو بہتر بنانا شامل ہیں۔ اس مقصد کے لیے لاکھوں کلومیٹر نئی ٹرانسمیشن لائنیں بچھانے کے ساتھ موجودہ نظام کو بھی جدید بنانا ہو گا۔

حیاتیاتی ایندھن پر انحصار کے خطرات

سیکرٹری جنرل نے خبردار کیا کہ توانائی کے عالمی بحران نے حیاتیاتی ایندھن پر انحصار کے خطرات واضح کر دیے ہیں، تاہم ڈیریو لیگوتی  (Dario Liguti) اس بحران میں ایک مثبت پہلو بھی دیکھتے ہیں۔ ان کا کہنا تھا کہ یہی بحران قابل تجدید توانائی میں بڑے پیمانے پر سرمایہ کاری اور اس کے استعمال میں اضافے کا سبب بن رہا ہے۔ انہوں نے وضاحت کی کہ قابل تجدید بجلی توانائی کا تحفظ مضبوط کر رہی ہے کیونکہ یہ مقامی ذرائع سے حاصل کی جا سکتی ہے اور اس کے لیے تیل اور گیس درآمد کرنے کی ضرورت نہیں رہتی۔ شمسی اور ہوائی توانائی کے منصوبے نسبتاً کم وقت میں تعمیر کیے جا سکتے ہیں، تاہم ان کی کامیابی کا انحصار اس بات پر ہوتا ہے کہ پیدا ہونے والی بجلی صارفین تک پہنچانے کا نظام موجود ہو۔

ٹیکنالوجی سستی، منتقلی مہنگی

گزشتہ ایک دہائی میں شمسی اور ہوائی توانائی سے بجلی پیدا کرنے کی لاگت میں نمایاں کمی آئی ہے لیکن ترقی پذیر ممالک کے لیے ان منصوبوں پر ابتدائی سرمایہ کاری اب بھی ایک بڑی رکاوٹ ہے۔ اقوام متحدہ کی یونیورسٹی سے وابستہ محقق اولی پیکا کوسیلا  (Olli-Pekka Koskela) نے یو این نیوز کو بتایا کہ غریب ممالک کو قرضوں پر کہیں زیادہ شرح سود ادا کرنا پڑتی ہے۔ اس وجہ سے صاف توانائی کے منصوبوں کے لیے مالی وسائل حاصل کرنا مشکل ہو جاتا ہے چاہے ان منصوبوں میں استعمال ہونے والی ٹیکنالوجی نسبتاً سستی ہی کیوں نہ ہو۔ انہوں نے کہا کہ شمسی اور ہوائی توانائی جیسی ماحول دوست ٹیکنالوجی میں ابتدائی سرمایہ کاری خاصی بھاری ہو سکتی ہے۔ اسی لیے سرمایے تک رسائی اور قرضوں پر مناسب شرح سود کی دستیابی انتہائی اہم ہے اور ترقیاتی بینک کم شرح سود پر قرضے فراہم کرکے اس مسئلے کے حل میں مدد دے سکتے ہیں۔

توانائی کے مضبوط نظام کی ضرورت

ایک اور اہم مسئلہ یہ ہے کہ بجلی کے نظام کو خود موسمیاتی تبدیلیوں کے اثرات برداشت کرنے کے قابل کیسے بنایا جائے۔ اولی پیکا کوسیلا نے زیمبیا کی مثال دیتے ہوئے بتایا کہ ملک میں شدید خشک سالی کے باعث پن بجلی کی پیداوار میں کمی واقع ہوئی جس کے نتیجے میں بجلی کی لوڈ شیڈنگ اور راشن بندی کرنا پڑی۔ مستقبل میں ایسے مسائل سے بچنے کے لیے شمسی توانائی کی پیداوار بڑھانا اور ہمسایہ ممالک کے ساتھ بجلی کی ترسیل کے روابط مضبوط بنانا مددگار ثابت ہو سکتا ہے۔